მოწმეებს ფაქტობრივად არანაირი ღირებული ინფორმაცია არ მიუწოდებიათ სასამართლოსთვის, ეს იყო დაკითხვა დაკითხვისთვის, - ასე შეაფასა ხორავას ქუჩაზე მოზარდების მკვლელობის საქმეზე დანაშაულის დაფარვაზე ბრალდებულის ადვოკატმა, მერაბ მამულაძემ ბრალდების მხარის მოწმეების გამოკითხვა.
როგორც ადვოკატი აცხადებს, დღევანდელ პროცესზე პროკურატურა არაინფორმაციული მოწმეების გამოკითხვით შემოიფარგლა.
"ჩვენ გვქონდა მოლოდინი, რომ აღნიშნულ საქმეზე დღეს მაინც დაიკითხებოდნენ მნიშვნელოვანი მოწმეები, როგორიც არიან კალანდიები, მაგრამ სამწუხაროდ ისინი ბრალდების მხარემ არ გამოიძახა და შემოიფარგლა მხოლოდ უმნიშვნელო და არაინფორმაციული მოწმეების დაკითხვით", - აცხადებს მამულაძე.
