საპარლამენტო უმრავლესობის ლიდერის, არჩილ თალაკვაძის განცხადებით, "ქართული ოცნების" თავმჯდომარის ბიძინა ივანიშვილის პოზიციის შემდეგ კიდევ უფრო გაიზრდება ინტერესი, რომ საპრეზიედნტო არჩევნებში დამოუკიდებელმა კანდიდატებმა მიიღონ მონაწილეობა.
მისი თქმით, პოლიტიკაში ბალანსის გაუმჯობესება მნიშვნელოვანი და საინტერესოა.
მისივე განცხადებით, გუნდში არაერთი ადამიანია, ვისაც შეუძლია არჩვენების მოგება. მისი თქმით, ასეთები არიან: დავით სერგეენკო, სოზარ სუბარი, გიორგი კახიანი და საზოგადოებაში არის დიდი სურვილი, რომ თავად ბიძინა ივანიშვილმა მიიღოს მონაწილეობა, თუმცა ჩვენთვის მისი პოზიცია ცნობილია.
თალაკვაძის თქმით, მას არ ჰქონია რუსეთთან ურთიერთობის საკითხებში საქართველოს პრემიერ-მინისტრის სპეციალურ წარმომადგენელ ზურაბ აბაშიძესთან დაკავშირებით კონსულტაციები, თუმცა, მისი თქმით, აბაშიძის მიმართ საზოგადოების აზრი პოზიტიურია.
ხოლო რაც შეეხება სალომე ზურაბიშვილის საპრეზიდენტო კანდიდატობის საკითხს, თალაკვაძის შეფასებით, ის ძლიერი კანდიდატი იქნება.
„სალომე ზურაბიშვილი დიდი პატივით სარგებლობს ქვეყანაში, საზღვარგარეთ, პარლამენტშიც და თუ ის გადაწყვეტს, ჩაერთოს კამპანიაში, ნამდვილად ძლიერი კანდიდატი იქნება. თუმცა ჩვენ რა პოზიციას დავაფიქსირებთ, უახლოეს დღეებში გახდება ცნობილი“, – განაცხადა არჩილ თალაკვაძემ.
მან აქვე დასძინა, რომ "ქართული ოცნების" საბოლოო პოზიცია რამდენიმე დღეში გახდება ცნობილი.
