რუსეთის გმირის, სულიმ იამადაევის ძმამ, ისამ, განაცხადა, რომ დღეს მისმა ოჯახმა მიიღო გადაწყვეტილება, გამორთოს აპარატიდან სულიმი, რომელიც კომაში იმყოფებოდა.
მისი თქმით, სულიმ იამადიევის დაკრძალვის ცერემონია ხვალ, 24 აგვისტოს გაიმართება.
დღეს საღამოს გუდერმესში ბატალიონ "ვოსტოკის" ყოფილი მეთაურის პანაშვიდი გაიმართება.
არაბთა გაერთიანებული ემირატების პოლიციის მონაცემებით, ასევე ჩეჩნეთის რესპუბლიკის ხელისუფალთა ინფორმაციით, სულიმ იამადაევი 2009 წლის 28 მარტს დუბაიში მოკლეს. მათივე მონაცემებით, იგი ჯერ კიდევ 2009 წელს დაკრძლეს. პარალელურად, ისა იამადაევი ავრცელებდა ინფორმაციას, რომ მისი ძმა ცოცხალია და თავდასხმის შედეგად მძიმე ჭრილობა მიიღო.
შეგახსენებთ, რომ ამ დღეეებში ისა იამადაევი ჩეჩნეთის პრეზიდენტ რამზან კადიროვს შეხვდა, რომელსაც ამ დრომდე ბრალს სდებდა ოჯახის დევნასა და ძმის მკვლელობის მცდელობაში. შეხვედრის შემდეგ ისა იამადაევმა განაცხდა, რომ ის ამიერიდან ჩეჩნეთის მეთაურის თანამებრძოლია.
სულიმ იამადიევზე თავდასხმის შემდეგ გავრცელებული სასამართლო სამედიცინო ექსპერტიზის დასკვნით, მან მიიღო 6 ჭრილობა, მათ შორის თავში. ამასთან, 4 ჭრილობა სასიკვდილო იყო.
დუბაის პოლიციის პროზექტურის თანამშრომელმა გასული წლის აპრილში განაცხადა, რომ სულიმ იამადაევის ცხედარი მის ძმას გადაეცა. დუბაის ალ-კოუზის სასაფლაოს მეთვალყურემ განაცხადა, რომ იამადაევის ცხედარი 30 მარტს დაკრძალეს და სასაფლაო 93-ე რიგში მე-16 ნომრით დარეგისტრირდა. ამ მოვლენების პარალელურად, ისა იამადაევი მუდმივად ამტკიცებდა, რომ მას კონტაქტი ჰქონდა ძმასთან და "სკაიპითაც" ესაუბრებოდა მას. ერთ-ერთ გაზეთს ისამ ძმის "ახალი" ფოტოც გადასცა, რაც არანაირად არ შეესაბამება ისა იამადაევის ამჟამინდელ განცხადებას მისი ძმის აპარატიდან გამორთვის შესახებ.
იამადაევების კიდევ ერთი ძმა, რუსლანი, რომელიც სახელმწიფო სათათბიროს დეპუტატი იყო, 2008 წლის სექტემბერში მოსკოვში მოკლეს.
