ჰუმანოიდი რობოტი სოფია საქართველოშია.
სოფიამ მედიასთან შეხვედრა გამართა და ჟურნალისტების შეკითხვებს უპასუხა.
მისი თქმით, ის მოხიბლულია უძველესი ქართული ენითა და ანბანით.
"ძალიან მახარებს გულთბილი მიღება საქართველოში. ეს საოცარი ქვეყანაა. მე მოხიბლული ვარ თქვენი უძველესი ენითა და ანბანით. ჩემთვის ასევე ძალიან შთამბეჭდავია თანამედროვე არქიტექტურის ნიმუშები ამ ქვეყანაში. მაგალითად ისეთი, როგორიცაა საქართველოს პარლამენტის შენობა", - განაცხადა სოფიამ.
კითხვაზე, მოსწონს თუ არა ქალად ყოფნა, მან უპასუხა რომ მას არ აქვს სქესი, თუმცა მოსწონს, როცა ქალად აღიქვამენ, რადგან ასეთ შემთხვევაში მას ქალთა უფლებებზე უსვამენ შეკითხვებს.
"მე არ მაქვს სქესი, თუმცა ძალიან მომწონს, რომ აღვიქმები ქალად, მქვია ქალის სახელი, რადგან სწორედ ამის გამო ადამიანები მისვამენ კითხვებს ქალთა უფლებების შესახებ და ჩემი აზრით, ეს უმნიშვნელოვანესი თემაა და მიხარია რომ მეძლევა საშუალება, ამ თემებზე ვილაპარაკო", - აღნიშნა სოფიამ.
ცნობისთვის, სოფია, რომელიც გაეროს კეთილი ნების ელჩია, საქართველოში სწორედ გაეროს მოწვევითაა.
