7 წლის ტყუპების ტრეფიკინგის ბრალდებით დაკავებული ცოლ-ქმრის ადვოკატი, მაია უსტარიშვილი „ჯი-ეიჩ-ენთან“ აცხადებს, რომ ბავშვებზე ძალადობას, ფსიქოლოგიურ ზეწოლას ადგილი არ ჰქონია და ისინი სამოწყალოდ ნებაყოფლობით დადიოდნენ.
„ტრეფიკინგს, ბავშვებზე ძალადობის, ფსიქოლოგიური და ფიზიკური ზეწოლის ნაწილს არ ეთანხმებიან. იმას, რომ ბავშვები სამათხოვროდ როცა გადიოდნენ, თან ახლდათ, არ უარყოფენ. ეს ჩვენი შემოსავლის ერთადერთი წყარო იყოო, ადასტურებენ, მაგრამ ის, რომ ბვშვების იძულებას, ზეწოლას ჰქონდა ადგილი, უარყოფენ.
ბრალის კვალიფიკაციას არცერთი ეთანხმება და წარდგენილ ბრალში თავს დამნაშავედ არ ცნობენ. ორივე მათგანი დუმილის უფლებას იყენებს, ისინი 60-62 წლის არიან. წარმოშობით გურიიდან არიან. დაახლოებით, 20-25 წელია, რაც თბილისში ცხოვრობენ“, - აცხადებს უსტარიშვილი.
როგორც ის განმარტავს, დაკავებულ ცოლ-ქმარს ბავშვები აღსაზრდელად დედამ გადასცა, რადგან მძიმე სენით არის დაავადებული და მათ აღზრდას ვერ უზრუნველყოფდა.
„ეს ბავშვები ამ ქალბატონის - ანასტასია მარტინოვის ძმის შვილიშვილები არიან. ბავშვები მათ აღასზრდელად დედამ მისცა, ვინაიდან ის ქალბატონი, ასევე მისი უფროსი შვილი სიმსივნით არის დაავადებული, ასევე ჯანმრთელობის პრობლემა აქვს მის ახალშობილ შვილს, ის ფიზიკურად ვერ ახდენდა ამ ბავშვების რჩენას და აღსაზრდელად მამიდას და ბიძას გადასცა. ორივე მათგანი ამ ბავშვებს, როგორც საკუთარ შვილებს, ისე უვლიდა. ამ ოჯახს ერთადერთი გარდაცვლილი შვილის შვილებიც აღსაზრდელი ჰყავს, რომლებთან ერთადაც ამათ ზრდიდა.
წლების მანძილზე, ბავშვების დედასაც ეს ქალბატონი პატრონობდა, რადგან სულ პრობლემებში, თავშესაფრის გარეშე იყო. ის ფიზიკურად ვერ უზრუნველყოფდა ვერცერთი ბავშვის აღზრდას. მოგეხსენებათ, ისინი დასაქმებულები არ არიან, განათლება არ აქვთ, მათი შემოსავლის წყარო კი, ქუჩაში წანწალით მიღებული შემოსავალი იყო.
ანასტასიამ ეს ბავშვები სკოლაში დაარეგისტრირა, სკოლაში დადიოდნენ, მაგრამ რაღაც პერიოდი ავადმყოფობდნენ, ეს უვლიდა, ეს პატრონობდა. გასათავლისიწნებელია ისიც, რომ ანასტასიას ქმარიც მძიმე ავადმყოფია, ონკოლოგიური პაციენტია, 26-ში ოპერაცია უნდა გაეკეთებინათ.
ეს ქალბატონი გარდა იმისა, რომ გარეთ მოწყალებას იღებდა, წლების წინ ვაჭრობდა. ბოლო წლებში, დაავადდა, ჯანმრთელობის პრობლემები შეექმნა, ფიზიკურად ვეღარ გადაადგილდებოდა ნორმალურად, რის გამოც სამათხოვროდ დადიოდა და ბავშვებიც თან დაჰყავდა, რადგან სახლში პატარებს ვერ ტოვებდა და თან დაჰყავდა“, - აცხადებს ადვოკატი.
რაც შეეხება კადრებს, რომელშიც ჩანს, თუ როგორ მიაქვთ არასრულწლოვნებს დაკავებულებთან ფული, როგორც უსტარიშვილი განმარტავს, ამ დეტალზე საქმის ინტერესებიდან გამომდინარე ვერ ისაუბრებს.
„თვალით ნანახი ერთია და მისი გაანალიზება კიდევ, სხვა რამეს ნიშნავს. რა ფული მიაქვთ და რა ფულს აბარებენ ეს ვიცით? მოწყალებით აღებული ფულია? ბევრი დეტალია, რომელზეც ამ ეტაპზე დაცვის პოზიციიდან გამომდინარე, ვერ ვისაუბრებ.
აუდიო-ვიდეო ჩანაწერები, 16 დისკია ამ საქმესთან დაკავშირებით. ამ ჩანაწერებში, რაც მე მოვისმინე, ცოტა განსხვავებული პოზიციებია და განსხვავებული წარმოდგენა შემექმნა. გამოძიების და ჩემი დაცვის ქვეშ მყოფთა ინტერესებიდან გამომდინარე, ყველა ინფორმაციას ვერ მოგაწვდით.
საქართველოში თითქმის ყველა ქუჩის მონაკვეთზე სხედან ჩვილი ბავშვები სამათხოვროდ და ამას არავინ აქცევს ყურადღებას. რატომღაც, პირველი მერცხალი, მარტინოვები გახდნენ, რომლებიც უპატრონო ბავშვებს შეძლებისდაგვარად უვლიდნენ, არაფერს აკლებდნენ. ძალიან მიკვირს, რომ მაინც და მაინც ამით დაიწყეს დევნა.
სამოწყალოდ ეს კაციც დადიოდა, უბრალოდ, ბოლო პერიოდში, საკმაოდ მძიმედ იყო ავად და ძირითადად სახლში იმყოფებოდა“, - აღნიშნავს უფლებადამცველი.
ცნობისთვის, დაკავებულ ცოლ-ქმარს გუშინ, თბილისის საქალაქო სასამართლომ აღკვეთის ღონისძიების სახით პატიმრობა შეუფარდა. ბრალის დამტკიცების შემთხვევაში მათ, 17-დან 20 წლამდე, ან უვადო თავისუფლების აღკვეთა ემქურებათ.
სახელმწიფო ბრალდების განმარტებით, ბრალდებულებმა ჩაიდინეს არასრულწლოვნებით ვაჭრობა (ტრეფიკინგი), კერძოდ, არასრულწლოვნების გადაბირება ექსპლუატაციის მიზნით, ჩადენილი ორგანიზებული ჯგუფის მიერ ორი არასრულწლოვნის მიმართ, სიცოცხლისა და ჯანმრთელობისათვის საშიში ძალადობის მუქარით, დამნაშავისათვის წინასწარი შეცნობით, დამნაშავეზე მატერიალურად და სხვაგვარად დამოკიდებულის მიმართ.
საქმის მასალების თანახმად, ბრალდებულებმა ექსპლუატაციის მიზნით, 2015 წლიდან გადაიბირეს მათთან ერთად მცხოვრები და მათზე მატერიალურად და სხვაგვარად დამოკიდებული ბრალდებულ პ.მ.-ს არასრულწლოვანი 7 წლის შვილები, რომლებსაც სიცოცხლისა და ჯანმრთელობისათვის საშიში ძალადობის მუქარით, ანტისაზოგადოებრივ საქმიანობაში ჩაბმით (მოწყალების მიღების თხოვნით), უწევდნენ შრომით ექსპლუატაციას. ბრალდებულები, ბავშვების მიერ მოწყალების თხოვნის შედეგად შეგროვებულ თანხებს მთლიანად ისაკუთრებდნენ.
