„თავდაცვისა და შინაგან საქმეთა სამინისტროების მხრიდან დარღვევას ადგილი არ ჰქონია,“ – ამის შესახებ განცხადება საპარლამენტო უმრავლესობის წარმომადგენელმა, სოფიო კილაძემ, პეტრე დევრიშაძის კუთვნილ კომპანიასთან ძალოვანი უწყებების თანამშრომლობასთან დაკავშირებით, ჟურნალისტებთან გააკეთა.
საუბარია სტუდია ”მონიტორის“ ჟურნალისტურ გამოძიებაზე, რომლის თანახმად, პეტრე დევრიშაძემ და მისი ოჯახის ორმა კომპანიამ ბოლო სამ წელიწადში 4 მილიონ ლარზე მეტი ღირებულების სახელმწიფო ტენდერი მოიგო. კომპანიები სახელმწიფო შეკვეთებს ძირითადად შინაგან საქმეთა და თავდაცვის სამინისტროებისგან იღებენ. თავად დევრიშაძე კი 2010 წელს ”გრუ“-სთან თანამშრომლობის ბრალდებით დააპატიმრეს. ის ოპერაცია “ენვერის” დროს დაკავებული 13 პირიდან ერთადერთია, რომელმაც რუსულ სპეცსამსახურთან თანამშრომლობა აღიარა და საჯაროდ დღემდე არ უარყვია. პეტრე დევრიშაძეს საპროცესო შეთანხმება 2011 წელს გაუფორმეს.
მმართველი გუნდის წევრები კი აცხადებენ, რომ მასთან ძალოვანი უწყებების მიერ კონტრაქტების დადებისას კანონი არ დარღვეულა.
„მოგეხსენებათ, ტენდერის ფარგლებში აბსოლუტურად დაფარულია იურიდიული პირების შესახებ მონაცემები და მხოლოდ მას შემდეგ ხდება კონკრეტული იურიდიული პირების გამოვლენა, რაც შესაბამისი პროცედურები იქნება გატარებული. ამასთან, არ არსებობს კანონში ჩანაწერი, რომელიც განსაზღვრავს რაიმე ვალდებულებას ან შესაძლებლობას იმისა, რომ ამ იურიდიული პირების უკან მდგომი პიროვნებები იყვნენ მოძიებული და მათი წარსულის შესახებ მოაგროვონ ინფორმაცია. თუ ოპოზიციას ქვეყნისთვის სასიკეთო ცვლილება სურს ამ მიმართულებით, მათ შეუძლიათ იფიქრონ შესაბამის საკანონმდებლო ცვლილებებზე. რაც შეეხება თავდაცვისა და შინაგან საქმეთა სამინისტროებს, როგორც კანონის აღსრულებაზე პასუხისმგებელ ორგანოებს, მათი მხრიდან არანაირ დარღვევას ადგილი არ ჰქონია,“ - განაცხადა სოფიო კილაძემ.
