გარდაიცვალა "იტარ-ტასის" საერთაშორისო ურთიერთობათა დეპარტამენტის დირექტორი იაკოვ ბოროვოი.
იაკოვ ბოროვოი იყო ნამდვილად გამორჩეული პიროვნება და საკუთარი ხალხის ღირსეული წარმომადგენელი. მან მნიშვნელოვანი წვლილი შეიტანა მრავალი ქვეყნის საინფორმაციო სააგენტოების ურთიერთობის გარღმავებაში. ნიშანდობლივია, რომ 2008 წლის სექტემბერში რუსეთ-საქართველოს შორის უკიდურესად დაძაბული ვითარების მიუხედავად, იაკოვ ბოროვოი ერთ-ერთი პირველი იყო ვინც მხარი დაუჭირა "ჯი-ეიჩ-ენის" გაწევრიანებას საერთაშორისო ორგანიზაციაში _ შავიზღვისპირეთის ქვეყნების ნაციონალური საინფორმაციო სააგენტოების ალიანსში.
ბოროვოის ჰქონდა ხანგრძლივი ჟურნალისტური კარიერა _ საკმაოდ წარმატებულად საქმიანობდა იგი "ნოვოე ვრემიაში", იტარ-ტასში.
იგი როგორც აღმოსავლეთმცოდნე ნაყოფიერ საქმიანობას ეწეოდა ამ მიმართულებითაც. იყო მრავალი საინტერესო წიგნის ავტორი, რომელიც გამოიცა რუსეთში და საზღვარგარეთის მრავალ ქვეყანაში.
მისი საქმიანობა არაერთგზის დაფასდა სხვადასხვა ჯილდოებით.
საინფორმაციო სააგენტო "ჯი-ეიჩ-ენი" სამძიმარს უცხადებს გარდაცვლილის ოჯახს და "იტარ-ტასს" იაკოვ ბოროვოის გარდაცვალების გამო.
