„ხელისუფლებამ ამ 6-წლის განმავლობაში გამართული ბიუჯეტის მიღება ვერ ისწავლა, რაც ბევრ ეჭვს იწვევს, მათ შორის კორუფციული თვალსაზრისით,“ – აცხადებს ფრაქცია “ნაციონალური მოძრაობის“ თავმჯდომარე, რომან გოცირიძე, 2017 წლის ბიუჯეტის შესრულების ანგარიშთან დაკავშირებით.
მისი თქმით, ყველაზე მთავარი პრობლემა ბიუჯეტის სწორად დაგეგმვა და მისი დროული შესრულებაა, რაც მისივე შეფასებით, გავლენას ახდენს მაკროეკონომიკურ ვითარებასა და ლარის გაუფასურებაზე. ამასთან, ის აქცენტს კანონის მოთხოვნების შესრულებაზეც აკეთებს. “ბიუჯეტის ხარჯები მშპ-ს 30%-ს არ უნდა აღემატებოდეს. კანონი ზედიზედ მეოთხე წელია, ირღვევა და ამაზე პასუხს არავინ აგებს. არის გაუთვალისწინებელი ხარჯები მთავრობის სარეზერვო ფონდიდან - იგეგმება დაახლოებით 40 მილიონის ფარგლებში, ხოლო შარშან, შარშანწინ 180-მილიონამდე იყო. ხშირად ეს წინასაარჩევნოდ, პოლიტიკური და სხვა მიზნებისათვის იხარჯება. მთავრობის სარეზერვო ფონდიდად თანხები სუბიექტურად იხარჯება. არის კურიოზული შემთხვევები. მაგალითად, სახელმწიფო ბიუჯეტიდან ბიზნესის სახლის ასაშენებლად ფული გამოყვეს. ბიზნესის სახლი ჯერ ჰაერშიც არ არსებობს. არც პროექტია და არც არაფერი და 82 მილიონი ლარი ერთ-ერთ მხარჯავ ორგანიზაციას კომერციულ ბანკში უდევს და ფაქტობრივად მევახშეობას ეწევა, ხოლო ხალხს ეუბნებიან, რომ პენსიის გასაზრდელი ფული არ აქვთ. 82 მილიონი ლარი გაყინულია, რაც ძალიან კურიოზული საბიუჯეტო შემთხვევაა, რადგან თუ არსებობს ფული, ის იმ წლის პროგრამებს უნდა მოახმარო. ბიუჯეტის ხარჯვაში არის მუდმივი ჩამორჩენა და ნარჩენების დეკემბერში ხარჯვა უკვე ტრადიციაა და ლარზე ზემოქმედებს,“ - აცხადებს რომან გოცირიძე.
2017 წლის ბიუჯეტის შესრულების ანგარიში “ნაციონალური მოძრაობის“ წარმომადგენლებს დღეს ფინანსთა მინისტრის მოადგილემ, გიორგი კაკურიძემ, გააცნო.