“ქართული ოცნების“ დეპუტატი შოთა შალელაშვილი მიხეილ სააკაშვილის წინააღმდეგ სამართლებრივი პროცედურების დაწყებას აპირებს.
ამის შესახებ მან განცხადება დღეს პარლამენტში საგანგებოდ გამართულ ბრიფინგზე გააკეთა და აღნიშნა, რომ მისმა იურისტებმა ამისთვის მზადება უკვე დაიწყეს.
შალელაშვილი აცხადებს, რომ მას ბიძინა ივანიშვილთან არასოდეს ჰქონია და არა აქვს რამე სახის ბიზნესურთიერთობა. თუმცა, ადასტურებს, რომ მისი ვაჟი მართლაც იყო ეჭვმიტანილი კიბერდანაშაულში აშშ-ში. ამასთან, მისი თქმით, მისი შვილი არ იმყოფება წინასწარ პატიმრობაში და ელის სასამართლო გადაწყევტილებას.
“სამწუხაროდ, არ მქონდა ნანახი “რუსთავი2“-ის ეთერში გასული გადაცემა, სადაც მიხეილ სააკაშვილმა “აფერისტი რუსი ებრაელი“ მიწოდა. პირადად მე, შოთა შალელაშვილი, ამას ვაფასებ, როგორც ანტისემიტურ და რასისტულ განცხადებას, რომელიც შეურაცხყოფას მაყენებს არა მხოლოდ მე, არამედ საქართველოში მცხოვრებ მთელ ებრაულ საზოგადოებას. თანამედროვე სამყარო შეთანხმდა, რომ ამ ენაზე არათუ პოლიტიკოსები, არამედ თანამედროვე ადამიანები არ საუბრობენ. სააკაშვილის ფსიქიურ მდგომარეობაზე მე ვერ ვისაუბრებ, მაგრამ ამ კაცმა მოახერხა და ამ სამ სიტყვაში პრაქტიკულად სამი დანაშაული ჩაიდინა.
„ამ ტიპის შეურაცხყოფაზე კი ვიწყებ პოლიტიკურ კამპანიას და შესაბამის პროცედურებს სააკაშვილის წინააღმდეგ. სამართლებრივ დონეზე, ჩემი რეაქცია იქნება მაქსიმალურად მკაცრი - ჩემმა იურისტებმა დიწყეს შესაბამისი სამართლებრივი პროცედურებისთვის მზადება!
„ეს განცხადება, ბუნებრივია, გაიგზავნება იმ მრავალრიცხოვან ებრაულ ორგანიზაციებში, რომლებიც მთელ მსოფლიოშია განთავსებული, საერთაშორისო ორგანიზაციებში, აშშ-ის კონგრესის ადამიანთა უფლებების დაცვის კომიტეტში. სააკაშვილის მხრიდან გაჟღერებული, სიძულვილით გამსჭვალულ ანტისემიტურ და რასისტულ განცხადებაზე ველი შესაბამის რეაქციას პოლიტიკური ძალების წარმომადგენლების მხრიდან, მედიის და სამოქალაქო ორგანიზაციების წარმომადგენლებისგან! იმედი მაქვს, ისინი გაემიჯნებიან ასეთ განცხადებებს და მოახდენენ კიდეც შესაბამის რეაგირებას,” - განაცხადა შალელაშვილმა.
