ჩვენ ვენდობით ხორავას ქუჩაზე მკვლელობის საქმის შემსწავლელ დროებით საგამოძიებო კომისიას და სამუშაო პროცესში ჩავერთვებით, – ამის შესახებ ხორავას ქუჩაზე მოკლული დავით სარალიძის ოჯახის ადვოკატმა, ნესტან ლონდარიძემ განაცხადა.
მისი განმარტებით, ის კომისიას დეტალურად გააცნობს ყველა მტკიცებულებას და დარღვევებს. ხვალინდელი შეხვედრის საუბარი შეეხება მტკიცებულებების განადგურების საკითხსაც. ადვოკატი კონკრეტულ ფაქტებზე მედიასთან საუბრისგან თავს იკავებს, თუმცა აცხადებს, რომ კომისია ყველა საჭირო ინფორმაციას მიიღებს.
ლონდარიძე ამბობს, რომ ისინი ენდობიან დროებით საგამოძიებო კომისიას, წინააღმდეგ შემთხვევაში, სამუშაო პროცესში არ ჩაერთვებოდნენ.
„ჩვენ დიდი იმედი გვაქვს, სხვაგვარად თანამშრომლობას არ დავიწყებდით კომისიასთან. ცხადია, ვენდობით და დიდი იმედი გვაქვს მათი მუშაობის. თვალყურს ვადევნებთ და ჩავერთვებით სამუშაო პროცესში“, – განაცხადა ნესტან ლონდარიძემ.
დროებითი საგამოძიებო კომისიის ხელმძღვანელი სერგი კაპანაძე დღეს ხორავას ქუჩაზე მოკლული არასრულწლოვანის მამას, ზაზა სარალიძეს შეხვდა.