„საგამოძიებო კომისია აბსოლუტურად ყველაფერს გააკეთებს იმისთვის, რომ გამოვლინდეს იმ პირთა ვინაობა, ვინც ხელი დააფარა დანაშაულის ჩამდენებს, ვინც გააყალბა ან გაანადგურა მტკიცებულებები, და კომისია არ მოერიდება არც ერთი თანამდებობის პირს,” - ეს განცხადება პარლამენტის საგამოძიებო კომისიის წევრმა, ფრაქცია „ევროპული საქართველოს“ წარმომადგენელმა, ოთარ კახიძემ დღეს პარლამენტში გააკეთა. მისი თქმით, მათთვის „არავითარი ზედა ზღვარი არ არსებობს“ და კომისიის და საზოგაოდების წინაშე კითხვებზე პასუხის გაცემა მოუწევს ყველა თანამდებობის პირს, ვისაც ჰქონდა რაიმე შემხებლობა ამ სისხლისსამართლის საქმესთან.

„ჩვენ გვაქვს მოლოდინი, რომ კვალიფიციური მუშაობის შედეგად, ჩვენ აუცილებლად ვამხელთ იმ პირებს, ვინც დანაშაული ჩაიდინა,” - ამბობს კახიძე.
ამასთან, მისი თქმით, სახალხო დამცველმა დაიწყო საქმის შესწავლა, და უკვე იკვეთება სერიოზული დარღვევები. ამიტომ კომისია ნინო ლომჯარიასთან ინტენსიურ თანამშრომლობას აპირებს. „დავით სარალიძეს მიყენებული აქვს 10-ზე მეტი ჭრილობა, და ჩვენ არ ვიცით, ვინ მიაყენა მას ეს ჭრილობა. ეს ვერ დაადგინა გამოძიებამ და სწორედ ეს არის ყველაზე დიდი კითხვის ნიშანი, ეს ნიშნავს, რომ თეთრი ძაფით არის ნაკერი ეს საქმე, ამიტომ შეიქმნა საგამოძიებო კომისია, რომ დაადგინოს ვინ კერავდა თეთრი ძაფით ამ საქმეს.

„გამოძიების ფარგლებში დაიკითხებიან აუცილებლად მაღალი თანამდებობის პირები, მათ შორის ნებისმიერი თანამდებობის პირი, როგორც პროკურატურაში, ისე შსს-ში. მე გვარებს ახლა ვერ გეტყვით, ვინ და რა თანმიმდევრობით მისცემს ახსნა-განმარტებას, საქმის მასალებს გავივლით და კომისია მიიღებს გადაწყვეტილებას,” - აცხადებს კახიძე.