სამედიცინო დოკუმენტაციით დასტურდება, მაგდა პაპიძის წამების კვალი, - განაცხადა „ჯი-ეიჩ-ენთან“ ადამიანის უფლებათა ცენტრის დირექტორის მოადგილემ, თამარ ავალიანმა.
სწორედ ადამიანის უფლებათა ცენტრმა მოამზადა სტრასბურგის სასამართლოსთვის მსჯავრდებულ მაგდა პაპიძის საჩივარი.
„ევროპულ სასმართლოში შევიტანეთ მაგდა პაპიძის საქმეზე საჩივარი, რომელიც დაკავების მომენტში და დაკავების შემდეგ, მის მიმართ განხორციელებულ ცემა-წამებას და არაადამაინურ მოპყრობას ეხება. ამ მიმართულებით გამოძიება რამდენიმე წელია ჭიანურდება. შესაბამისად, ვნახეთ, რომ გამოძიება არაეფექტრი იყო, იდენტიფიცირებული არ იქნა კონკრეტული ბრალდებული პირები. არადა, სამედიცინო დოკუმენტაციით დასტურდება, მაგდა პაპიძის წამების კვალი. დაკავებისას ის ორსულად იყო, რამდენიმე დღის შემდეგ ორსულობა შეწყდა. ძალიან მაღალი ალბათობით, ეს მოხდა იმის გამო, რომ მაგდა პაპიძე პოლიციის განყოფილებაში სასტიკად იქნა ნაცემი დ ნაწამები, რაც ასევე სამედიცინო დოკუმენტებით დასტურდება“, - აცხადებს ავალიანი.
მისი განმარტებით, საქმეში გამოძიების ეტაპზე მნიშვნელოვანი დარღვევები იქნა დაშვებული.
„მიმაჩნია, რომ მის საქმეში გამოძიების კუთხით, არსებითი დარღვევებია. პაპიძეს პერიოდულად ვხვდები, ბოლოს დაახლოებით, 3 კვირის წინ შევხვდი, სანამ სარჩელს გავაგზავნიდი, ხელი მოვაწერინე“, - დასძენს ავალიანი.