დრო მივეცი ხელისუფლებას, იმიტომ რომ ველოდები კონკრეტულ ნაბიჯებს, - ამის შესახებ ხორავას ქუჩაზე მომხდარი ტრაგედიის დროს მოკლული მოზარდის მამამ ზაზა სარალიძემ გადაცემა "რეაქციაში" განაცხადა.
"პრემიერს და შს მინისტრს მივაწოდე ჩემებური გამოძიების დეტალები, რომლის გახსნაშიც, პრაქტიკულად, ზვიად კუპრავა დამეხმარა და ბოლომდე გვერდით მედგა. ბატონმა გიორგიმ ყველაფერი ჩაიწერა, ვინ მფარველობდა, მე ვისი სახელები და გვარებიც მივაწოდე და ვის შეიძლებოდა გაეყალბებინა, დაწყებული პატარა გამომძიებლებით დამთავრებული შოთაძით, ასევე ვინც მის უკან და ზემდგომ დგას.
იცით, რომ დრო მივეცი ხელისუფლებას, იმიტომ რომ ველოდები კონკრეტულ ნაბიჯებს. კონკრეტულ ნაბიჯებში იგულისხმება ის, რომ ხელისუფლებამ აუცილებლად უნდა გადადგას ის ნაბიჯები, რომ გამოაშკარავოს კონკრეტული პირები, ვისზედაც უკვე ხელმოსაჭიდი აქვთ რამე. თუნდაც მირზა სუბელიანზე, რომელზეც სამართლებრივი დევნის დაწყების საფუძველიც არსებობს. ასევე, მიხეილ კალანდიაზეც აბსოლუტური დეტალები აქვთ, რომ მისცენ პასუხისგებაში. დანარჩენი თვითონ უნდა გადაწყვიტონ. თუ მოთხოვნა არ დაკმაყოფილდება მე არ გავჩერდები", - განაცხადა ზაზა სარალიძემ.
