ტერორისტულ ორგანიზაციაში პირების გაერთიანებისა და ტერორისტული ორგანიზაციებისა და ორგანიზაციის წევრებისთვის ხელშეწყობის საქმეზე ბრალდებულ რუსლან ალდამოვის ადვოკატის, მარიამ კუბლაშვილის განცხადებით, პირები, რომელთაც ბრალი მძიმე დანაშაულის ჩადენისთვის აქვთ წაყენებული, შეღავათებით არ უნდა სარგებლობდნენ.
დღეს, სასამართლო სხდომაზე ერთ-ერთი ბრალდებული, ზურაბ გორნაკაშვილი დაიკითხა. ის აღნიშნულ საქმეზე ბრალებულია, თუმცა, მისი საქმის ნაწილი ბადურ ჩოაფანაშვილთან ერთად ცალკეა გამოყოფილი.
„მან თავიდანვე აღიარა დანაშაული და ითანამშრომლა გამოძიებასთან, რადგან სურს საპროცესო შეთანხმების გაფორმება. ამ პროცესებში შეჯიბრებითობის პრინციპის დასაცავად ჩემი მოთხოვნაა, ნუ ხდება ნურანაირი შეღავათების გაწევა ბრალდებულებისთვის, რადგან მათ ბრალად ედებათ მძიმე დანაშაულის ჩადენა.
ბრალდების მხარე გვეუბნება, რომ ბრალდებულებმა ჩაიდინეს მძიმე დანაშაული, ამისთვის მოეწყო ძალიან დიდი შოუ, მასიური სპეცოპერაცია, გარდაცვლილია ადამიანი, არის ძალიან დიდი მსხვერპლი და დღეს ის ადამიანი, რომელსაც ასეთი მძიმე დანაშაულის ჩადენაში ედება ბრალი, სხვა ბრალდებულებს ხელს ადებს, რათა ძალიან მალე გამოვიდეს გარეთ და ისარგებლოს შეღავათებით.
7-8-ჯერ არის დაკითხული ეს ადამიანი გამოძიების ეტაპზე და ურთიერთსაწინააღმდეგო ჩვენებები აქვს მიცემული ყველა ჯერზე. მან დღეს პირდაპირ აღიარა რომ გამოძიება მოატყუა და თავიდანვე ცრუ ინფორმაციები მიაწოდა მათ. ის არის ცრუ მოწმე.
მე დღეს ვაპროტესტებ ამ უსამართლობას და მივმართავ პროკურატურას, მას ვინც დაინიშნება მთავარ პროკურორად, ამ ადამიანებთან არ გაფორმდეს არავითარი საპროცესო შეთანხმება და არ ისარგებლონ ამ ადამიანებმა არავითარი შეღავათებით. ამ მოწმეების გარდა, ბრალდების მხარეს არავითარი სხვა მტკიცებულება საქმეში არ აქვს“, - აცხადებს კუბლაშვილი.
სუს-ის მიერ ჩატარებული სპეცოპერაციის შედეგად დაკავებული 6 პირიდან, 4- ს ბრალი ტერორისტებისთვის ხელშეწყობაში, ხოლო 2 პირს, ტერორისტული ორგანიზაციის წევრობაში ედება ბრალი, ერთ-ერთს, ასევე ბრალი ედება საქართველოში.
