პროკურატურა მითაიშვილს ხელს აფარებს, რადგან მითაიშვილი მათ აშანტაჟებს, - განუცხადა „ჯი-ეიჩ-ენს“ ადვოკატმა ინგა არახამიამ. მის საცხოვრებელ სახლს წუხელ გვიან ღამით, 5 ტყვია ესროლეს. ადვოკატი ამ ფაქტს მის საქმიანობას უკავშირებს. ის ყოფილი პროკურორის, მილენა მითაიშვილის ყოფილი ქმრის, რივერა ბენდელიანის ადვოკატია.
„არაფრის მტკიცება შემიძლია, იქიდან გამომდინარე, რომ არ ვიცი ეს ვინ გააკეთა, თუმცა, ეჭვი გამაჩნია. შესაძლოა, ეს დაშინების მიზნით მოხდა. პროკურორ მითაიშვილის საქმე ერთადერთია, რომელსაც ამას ვუკავშირებ, სხვა არცერთი საქმე არ მაქვს ისეთი, რომ ვიღაც მოვიდეს, მესროლოს, შემაშინოს“, - აცხადებს არახამია.
როგორც ის განმარტავს, მითაიშვილი პროკურატურას გახმაურებული საქმეების დეტალების გასაჯაროებით ემქურება.
„მხოლოდ მითაიშვილში არაა პრობლემა, აქ მთელი სისტემა, მთელი პროკურატურაა ჩართული. პროკურატურა მითაიშვილს ხელს აფარებს, რადგან მათ მითაიშვილი აშანტაჟებს. მითაიშვილი იყო ძალიან გახმაურებული საქმეების - რაფალიანცის, ვანო მერაბიშვილის საქმის პროკურორი. ის ამ საქმეებით პროკურატურას აშანტაჟებს. ზუსტად ვიცი, მითაიშვილი შოთაძესთან კაბინეტში ბოლო ხმაზე კიოდა, თუ არ დამიცავთ, პირდაპირ „რუსთავი2“-ში წავალ და ყველა საქმეზე ყველაფერს მოვყვებიო.
ამიტომაც, შოთაძე მას ხელს აფარებდა. სამსახურეობრივი შემოწმების დასკვნაზე, რომელიც გენინსპექციაში არის, წერილობით განმარტებას არ მაძლევენ, თუ რა დაადგინა შემოწმებამ“, - დასძენს ადვოკატი.
წუხელ მომხდარ ფაქტთან დაკავშირებით საგამოძიებო მოქმედებები მიმდინარეობს, დანიშნულია ექსპერტიზა. არახამიას გამოკითხვაზე სავარაუდოდ, დღეს დაიბარებენ.
მომხდარზე გამოძიება სსსკ-ის 236-ე მუხლით მიმდინარეობს, რაც ცეცხლსასროლი იარაღის მართლსაწინააღმდეგო შეძენა, შენახვა, ტარება, დამზადება, გადაზიდვა, გადაგზავნა ან გასაღებას გულისხმობს.
