არასამთავრობო ორგანიზაციები [რომლებიც თეა წულუკიანის გადადგომას ითხოვენ] არაკორექტულები, არაეთიკურები არიან და ასეთი განცხადებებით პროფესიულ ვალდებულებებსაც სერიოზულად არღვევენ, - ამის შესახებ პარლამენტის ვიცე-სპიკერმა გია ვოლსკიმ განაცხადა.
მისი თქმით, თეა წულუკიანი ერთ-ერთი კომპეტენტური მინისტრია და მას არა მხოლოდ საქართველოში, არამედ მსოფლიოშიც კარგად იცნობენ.
„დარწმუნებული ვარ, იუსტიციის მინისტრი მთავარი პროკურორის კანდიდატურების შერჩევისას სწორ გადაწყვეტილებას მიიღებს. პროკურატურის მიმართ მისი განცხადება იმას არანაირად არ უნდა განაპირობებდეს, რომ არასამთავრობო ორგანიზაციები პოლიტიკურ პროცესში პირდაპირ ჩაერთონ და გარკვეული პოლიტიკური პლატფორმა დაიკავონ, რაშიც არაერთხელ არიან შემჩნეულნი. ამ შემთხვევაში, არასამთავრობო ორგანიზაციები არაკორექტულები, არაეთიკურები არიან და ასეთი განცხადებებით პროფესიულ ვალდებულებებსაც სერიოზულად არღვევენ“, – განაცხადა გია ვოლსკიმ.
ცნობისთვის, არასამთავრობო ორგანიზაციები თეა წულუკიანის გადადგომას ითხოვენ.
მათ ერთობლივი პრესკონფერენცია გამართეს, სადაც აღნიშნეს, რომ ახალი მთავარი პროკურორი იუსტიციის მინისტრმა აღარ უნდა შეარჩიოს.
არასამთავრობო ორგანიზაციები მთავრობას მოუწოდებენ, თეა წულუკიანი გადააყენოს.
