მინდოდა მისი [ზაზა სარალიძის] „ნაციონალური მოძრაობის“ მძევლობიდან დახსნა, რადგან „ნაციონალურმა მოძრაობამ“ ეს კაცი პირდაპირ მძევლად აიყვანა, მის ტკივილს და ტრაგედიას აშკარად იყენებს იმისთვის, რომ რევოლუცია დაიწყოს და მოაწყოს, – ამის შესახებ თბილისის მერობის ყოფილმა კანდიდატმა ალეკო ელისაშვილმა ჟურნალისტებს რუსთაველის გამზირზე განუცხადა, სადაც ის ზაზა სარალიძის სანახავად მივიდა.
მისივე თქმით, სარალიძეს ამ დღეების განმავლობაშიც მოუწოდებდა, გვერდიდან ჩამოეშორებინა „ნაციონალური მოძრაობის“ წარმომადგენლები, მათ შორის ზვიად კუპრავაც, რადგან ამ პოლიტიკური ძალის წარმომადგენლები ადამიანის გულწრფელ ტრაგედიასა და ტკივილს საკუთარი მიზნების განხორციელებისთვის იყენებენ.
მან „ქართულმა ოცნებას“ მოუწოდა, დღის ბოლომდე დაასახელოს მთავარ პროკურორად შალვა შავგულიძე ან ანა დოლიძე.
„ჩემი აზრით, ეს არის დაუშვებელი და ძალიან დიდი უსინდისობა. რეალურად მთლიანად გაიფანტება ყველაფერი, რაც ამ დღეების განმავლობაში იყო და „ნაციონალური მოძრაობა“ დაეხმარება „ქართულ ოცნებას“, გამოძვრეს ამ სიტუაციიდან. თუკი რაიმე ჭკუა აქვთ „ქართულ ოცნებაში“, მინდა მათ კატეგორიულად მივმართო – „ქართულმა ოცნებამ“ დღის ბოლომდე დაასახელოს მთავარ პროკურორად შალვა შავგულიძე ან ანა დოლიძე და არავინ სხვა. ტვინს აურევენ „ნაციონალური მოძრაობის“ წევრები ზაზა სარალიძეს, მაგრამ ეხ იმას არ ნიშნავს, რომ ყველაფერი ამით დასრულდება“, – განაცხადა ალეკო ელისაშვილმა.