ჩვენმა სტრატეგიამ და ტაქტიკამ ჩამოშალა გუშინ სუს-ი, - ამის შესახებ ზვიად კუპრავამ ჟურნალისტებს განუცხადა.
მის გუშინდელ განცხადებასთან დაკავშირებით [ის და ზაზა სარალიძე თანამებრძოლები აღარ არიან], კუპრავამ აღნიშნა, რომ გასული ორი დღის განმავლობაში მასზე და ზაზა სარალიძეზე სუს-ი ახორციელებდა შეტევას.
„სუს-ს ჰქონდა ძალიან ფართომასშტაბიანი და ორგანიზებული შეტევა ბოლო ორი დღის განმავლობაში, გუშინ და გუშინწინ. პრაქტიკულად სუს-მა და უშიშროების სამსახურებმა, რაც მათ გააჩნდათ, აბსოლუტურად ყველა რესურსი გამოიყენეს ჩვენს წინააღმდეგ, ორი ადამიანის წინააღმდეგ. შესაბამისად ჩვენ გვჭირდებოდა კონკრეტული ტაქტიკა, რათა მოგვეგერიებინა სუს-ის ეს ორგანიზებული შეტევა. ჩვენმა სტრატეგიამ და ტაქტიკამ ჩამოშალა გუშინ სუს-ი“, -განაცხადა ზვიად კუპრავამ.
ჟურნალისტების შეკითხვაზე, გამოიწვია თუ არა აქციის მონაწილეთა შორის უკმაყოფილება და განხეთქილება აქციაზე სხვადასხვა პოლიტიკური პარტიისა და ფიგურის გამოჩენამ, კუპრავამ განაცხადა, რომ "სხვა კითხვებს არ უპასუხებს".
