მიმაჩნია, რომ ეს სასჯელი საკმაოდ არაადეკვატურია, - განაცხადა ხორავას ქუჩაზე მომხდარი მკვლელობის საქმეზე ერთ-ერთი მსჯავრდებულის ადვოკატმა, ტარიელ კაკაბაძემ.
როგორც ის განმარტავს, მას შემდეგ, რაც სამოტივაციო ნაწილს ჩაიბარებენ და გაეცნობიან თუ როგორ დაასაბუთა მოსამართლემ გადაწყვეტილება, შემდეგ ჩამოაყალიბებენ პოზიციას, გაასაჩივრებენ თუ არა გადაწყვეტილებას სააპელაციო სასამართლოში.
"იმ ფონზე როდესაც სასამართლომ არ გაიზიარა ბრალდების მხარის ვერსია, არგუმენტაცია და ჩათვალა, რომ ჩემი დაცვის ქვეშ მყოფს არ მოუკლავს დავით სარალიძე, მიმაჩნია, რომ ეს სასჯელი საკმაოდ არაადეკვატურია. თუმცა, ჩვენთვის განსაკუთრებულად მნიშვნელოვანი იქნება ვნახოთ, განაჩენის სამოტივაციო ნაწილი,თუ როგორ დაასაბუთებს მოსამართლე აღნიშნულ გადაწყვეტილებას. ამის შემდეგ ჩამოვაყალიბებთ პოზიციას გავასაჩივრებთ, თუ არა აღნიშნულ გადაწყვეტილებას სააპელაციოში", - აცხადებს კაკაბაძე.
ყოფილი პროკურორის, ირაკლი შოთაძის განცხადებაზე, რომ საქმეში უცხოელი სპეციალისტები ჩაერთვებიან, კაკაბაძე აცხადებს, რომ ეს სანამ საქმე დაენგრეოდათ, მანამდე უნდა გაეკეთებინათ.
"ბრალდების მხარე ამით ცდილობს, მის მიერ დანგრეული საქმე გააპრავოს ასე რომ ვთქვათ და უნდა რომ საზოგადოების მუხტი ჩაახშოს. ფაქტობრივად ეს არის ერთი ჩვეულებრივი ტრიუკი, რომელიც სავარაუდოდ ბრალდების მხარემ მოიფიქრა, რათა გააჩეროს საზოგადოება. თუ უცხოელი ექსპერტების მოწვევა უნდოდათ , რა უშლიდათ მათ ხელს მანამ სანამ განაჩენი დადგებოდა, სანამ დაენგრეოდათ საქმე და სანამ სასამართლო დაადგენდა, რომ საქმე არია არასწორად გამოძიებული, მანამდე მოეწვიათ უცხოელი ექსპერტები. მით უმეტეს, რომ უამრავი მტკიცებულების გამოკვლევა მოხდა სასამართლოში, რომელიც არა ჩემი დაცვის ქვეშ მყოფის, არამედ სხვა პირების დანაშაულზე მიუთითებდა", - აცხადებს კაკაბაძე.
