მთავარი პროკურორის თანამდებობაზე სამოქალაქო საზოგადოებისა და სხვა პროფესიულ წრეებთან შეთანხმებით ისეთი კანდიდატურის დასახელება უნდა მოხდეს, რაც ფართო საზოგადოებისთვის მისაღებია და რომელსაც მიუკერძოებლის, აპოლიტიკური და პროფესიონალი ადამიანის რეპუტაცია აქვს, – ამის შესახებ საქართველოს სახალხო დამცველმა ნინო ლომჯარიამ ჟურნალისტებს განუცხადა.
მისი თქმით, როგორ წარიმართება მოვლენები, ეს დაგვანახებს ხელისუფლებას დამოუკიდებელი საგამოძიებო უწყებების მიმართ როგორი დამოკიდებულება ექნება.
„ვფიქრობ, მომავალი მთავარი პროკურორის არჩევა ქვეყანაში განვითარებულ მოვლენებზე სახელმწიფოს ერთ-ერთი პასუხი უნდა იყოს. როგორ წარიმართება მოვლენები, ეს დაგვანახებს ხელისუფლებას დამოუკიდებელი საგამოძიებო უწყებების მიმართ როგორი დამოკიდებულება ექნება. ამიტომ ძალიან მნიშვნელოვანია, ამ პროცესში არ დარჩეს შეგრძნება, რომ პოლიტიკური ხელისუფლება მისთვის სასურველი კანდიდატის დასახელებას ცდილობს.
აუცილებელია, პროცესი მაქსიმალურად ინკლუზიური იყოს. სამოქალაქო საზოგადოებისა და სხვა პროფესიულ წრეებთან შეთანხმებით ისეთი კანდიდატურის დასახელება უნდა მოხდეს, რაც ფართო საზოგადოებისთვის მისაღებია და რომელსაც მიუკერძოებლის, აპოლიტიკური და პროფესიონალი ადამიანის რეპუტაცია აქვს. ეს საზოგადოებისთვის ძალიან მნიშვნელოვანი გზავნილი იქნება“, – განაცხადა ნინო ლომჯარიამ.