ეს იქნება ძალიან სერიოზული გამოცდა პარლამენტისთვის და მისი სანდოობისთვის. იმედი მაქვს, რომ ეს არ იქნება გამოყენებული ან დროის გასაჭიანურებლად, გარკვეული მანიპულირებისთვის, ან ვინმეს ხელის დასაფარებლად, - ამის შესახებ ფრაქცია "ევროპული საქართველოს" თავმჯდომარე გიგი წერეთლმა საპარლამენტო საგამოძიებო კომისიის შექმნასთან დაკავშირებით განაცხადა.
მისი თქმით, პარლამენტში მიღებული გადაწყვეტილება საგამოძიებო კომისიის შექმნის შესახებ არის სწორი, მართებული და დროული ინიციატივა, რომელიც "ევროპულმა საქართველომ" შეიტანა პარლამენტში.
"ძალიან სამწუხაროა, რომ დღეს გამოძიება ძალიან დაბალი ნდობით სარგებლობს ერთის მხრივ და მეორეს მხრივ სასამართლო სისტემა ვერ ასრულებს ფუნქციას და როგორც ჩვენ ვნახეთ, სასამართლოს გადაწყვეტილებამ ბევრი კითხვის ნიშანი გააჩინა და რაც ყველაზე მთავარია, კვლავ ბურუსით მოცულია ვინ არის რეალურად დამნაშავე ამ ტრაგედიაში. მიმაჩნია, რომ ეს იქნება ძალიან სერიოზული გამოცდა პარლამენტისთვის და მისი სანდოობისთვის. იმედი მაქვს, რომ ეს არ იქნება გამოყენებული ან დროის გასაჭიანურებლად, გარკვეული მანიპულირებისთვის, ან ვინმეს ხელისდასაფარებლად. სწორედ ამდენი მცდელობის შემდეგ, წლების განმავლობაში საპარლამენტო საგამოძიებო კომისიის შექმნისა ეს არის მართლაც პირველი შემთხვევა და უნდა იყოს გამოყენებული იმისთვის, რომ დადგინდეს სიმართლე, დაისაჯონ დამნაშავეები და საზოგადოებაში გაიფანტოს ეჭვები. ყველაზე მთავარი არის, რომ ამგვარი შემთხვევების პრევენცია მოხდეს და ყველა შემთხვევაში უნდა არსებობდეს განცდა, რომ ნებისმიერი ასეთი ფაქტი არ დარჩება დასჯის გარეშე რაც არ უნდა ის დაკავშირებული იყოს ხელისუფლებასთან", - განაცხადა გიგი წერეთელმა.