ჩვენ გვესმოდა შედარებები გირგვლიანის საქმესთან, რაც არის ჩემთვის პრინციპულად მიუღებელი, - ამის შესახებ საქართველოს პარლამენტის თავმჯდომარე ირაკლი კობახიძმ პარლამენტში განაცხადა.
მისი თქმით, სისხლის სამართლის საქმეების მიმართ ხელისუფლებას არ აქვს არც ზოგადი და არც სუბიექტური ინტერესი.
მისივე თქმით, გირგვლიანის საქმეზე მაშინდელმა ხელისუფლებამ ერთი კონკრეტული ადამიანის წინააღმდეგ პრინციპულად ჩაიდინა დანაშაული. ხორავას ქუჩაზე მომხდარი მკვლელობის შემთხვევაში კი, სახეზეა ძალიან მძიმე დანაშაული.
„ჩვენ გვესმოდა შედარებები გირგვლიანის საქმესთან, რაც არის ჩემთვის პრინციპულად მიუღებელი. გირგვლიანის საქმე იყო საქმე, სადაც ხელისუფლებამ პრინციპულად ჩაიდინა დანაშაული ერთი კონკრეტული ადამიანის წინააღმდეგ. ეს იყო ხელისუფლების შეთქმულება ერთი ადამიანის წინაღმდეგ და ამ შეთქმულებაში ჩართული იყო მთელი მაშინდელი სახელისუფლო სპექტრი. ეს იყო ხელისუფლების დანაშაული, რომელიც ჩადენილი იქნა ერთი ადამიანი წინააღმდეგ. ამ შემთხვევაში კი, ჩვენ საქმე გვაქვს ძალიან მძიმე დანაშაულთან, თუმცა ეს არის სისხლის სამართლებრივი საქმე, რომელიც უნდა იყოს გამოძიებული სათანადო პროცედურების შესაბამისად და ჩვენი მთავარი ინტერესი მდგომარეობს იმაში, რომ სათანადოდ აღსრულდეს სამართალი ამ საქმესთან დაკავშირებით. ყოველგვარი შედარება გირგვლიანის საქმესთან ან სხვა მსგავსი შედარებები უნდა ჩაითვალოს მხოლოდ და მხოლოდ სპეკულირებად და ჩვენ ასეთ სპეკულაციებს ვერ მივიღებთ“, – განაცხადა ირაკლი კობახიძემ.