ვგმობთ სირიის გადაწყვეტილებას, ამას დიდი გამოხმაურება მოყვა ბრიუსელში, – ამის შესახებ საქართველოში ევროკავშირის ელჩმა იანოშ ჰერმანმა საქართველოს საგარეო საქმეთა სამინისტროში განაცხადა, სადაც ოკუპირებული აფხაზეთისა და „სამხრეთ ოსეთის“ სირიის მიერ „აღიარების“ საკითხზე დიპლომატებთან შეხვედრა გაიმართა.
მისი თქმით, ევროკავშირი გააგრძელებს ძალისხმევას, რომ საქართველოს მოწყვეტილ რეგიონებში, აფხაზეთსა და ოსეთში ამ კონფლიქტის მშვიდობიანი გადაჭრა მოხდეს
„საქართველოს პოზიციის შესახებ ჩვენ მივიღეთ ინფორმაცია საქართველოს საგარეო საქმეთა მინისტრის მოადგილე დავით დონდუასგან. ამ სიახლეს აქვს დიდი გამოხმაურება ბრიუსელში.
ახლა რაც შემიძლია გითხრათ, ისაა, რომ ევროკავშირი სრულად უჭერს მხარს საქართველოს ტერიტორიულ მთლიანობასა და სუვერენიტეტს მის საერთაშორისოდ აღიარებულ საზღვრებში და ამიტომაც, ნათელია, რომ ჩვენ ვგმობთ სირიის გადაწყვეტილებას, რაც ეწინააღმდეგება საერთაშორისო სამართალს. ასევე, ევროკავშირის დიდი ხნის პოლიტიკას არაღიარების შესახებ.
დავამატებ, რომ ევროკავშირი გააგრძელებს ძალისხმევას, რომ საქართველოს მოწყვეტილ რეგიონებში, აფხაზეთსა და ოსეთში ამ კონფლიქტის მშვიდობიანი გადაჭრა მოხდეს“, – განაცხადა იანოშ ჰერმანმა.