ბრალდება იმ მოწმის ჩვენებას ეყრდნობა, რომელმაც ხუთჯერ შეცვალა ჩვენება, - ამის შესახებ ხორავას ქუჩაზე მომხდარი მკვლელობის საქმეში ერთ-ერთი ბრალდებულის ადვოკატმა, ტარიელ კაკაბაძემ ბრალდების მხარის დასკვნითი სიტყვის შეფასებისას ჟურნალისტებთან განაცხადა.
როგორც ადვოკატმა განმარტა, ბრალდების პოზიცია იყო დაუსაბუთებელი და მხოლოდ ერთი მოწმის ჩვენებას ეყრდნობოდა, რომელმაც რამდენჯერმე შეცვალა ჩვენება.
"მოვისმინეთ ბრალდების მხარის დასკვნითი სიტყვა რომელიც იყო დაუსაბუთებელი. რაც შეეხება დაცვის მხარის დასკვნით სიტყვას, ჩვენ გავაბათილებთ ყველა იმ მსჯელობას და არგუმენტაციას, რაც ბრალდებას ჰქონდა დასკვნით სიტყვაში.
ჩვენ დეტალურად მიმოვიხილავთ საქმეში არსებულ ყველა მტკიცებულებას, ექსპერტთა ჩვენებებს, ექსპერტიზის დასკვნას და დარწმუნებული ვარ წარმატებით შევძლებთ ჩვენი პოზიციის დაცვას.
ბრალდების მხარემ საკუთარ დასკვნით სიტყვაში მოიყვანა მოწმეთა ჩვენებები დამახინჯებული ფორმით.
მოწმეებს მიაწერა ისეთი ნათქვამი, რაც მათ არ უთქვამთ.
საქმეში არსებული ყველა მტკიცებულება მიუთითებს დაცვის მხარის პოზიციის მართებულობას. ბრალდება იმ მოწმის ჩვენებას ეყრდნობა, რომელმაც ხუთჯერ შეცვალა ჩვენება", - განაცხადა ტარიელ კაკაბაძემ.