„საშიში ტენდენციაა, როდესაც თავისუფლების შეზღუდვის სფერო ფართოვდება,“ - ამის შესახებ განცხადება „ევროპული საქართველოს“ წევრმა, ირაკლი კიკნაველიძემ, გააკეთა.
კიკნაველიძის განცხადებას პარტიის პრესსამსახური ავრცელებს, რომლითაც ის გამოეხმაურა იმ საჯარო მოხელეების წრის გაფართოებას, რომლებსაც აქციებსა და მანიფესტაციებში მონაწილეობის შეზღუდვა აქვთ.
“ლეგიტიმურია, როდესაც პოლიციელებს და ჯარისკაცებს შეზღუდული აქვთ მანიფესტაციების მოწყობის თავისუფლება, მაგრამ პრობლემას წარმოადგენს ის, რომ ფართოვდება იმ სფეროების და იმ ადამიანებისა სივრცე, რომლებსაც ეს უფლება შეეზღუდებათ. მაგალითად, ასეთი არის მეხანძრე, მეტყევე, რომელიც ტყეში თოფით იცავს, რომ უკანონოდ ხე არავინ მოჭრას, მაგრამ მას უნდა ჰქონდეს და მას აქვს უფლება მშვიდობიანად გააპროტესტოს მისთვის მნიშვნელოვანი თემა. ამიტომ ზოგადად, ამ საკითხთან დაკავშირებით მომეტებული სიფრთხილე გვჭირდება ყველას იმიტომ, რომ საშიშია თავად ტენდენცია, როცა თავისუფლებების შეზღუდვის სფერო ფართოვდება,“ - განაცხადა ირაკლი კიკნაველიძემ.