დასრულდა არასრულწლოვანი ბრალდებულის პირდაპირი წესით დაკითხვა, მისი ჩვენებით სრულად დადასტურდა რომ კონფლიქტში სხვა ადამიანებიც მონაწილეობდნენ, სხვა ადამიანების მიერ მოხდა დავით სარალიძის დაჭრა - განაცხადა ჟურნალისტებთან ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატმა, ტარიელ კაკაბაძემ.
ჟურნალისტების კითხვაზე, დაადასტურა, თუ არა ბრალდებულმა მკვლელობის შემდეგ ყოფილ პროკურორთან, მირზა სუბელიანთან შეხვედრა, პასუხობს, რომ კი.
"მოწმის ჩვენებით აღნიშნული დადასტურდა და დადასტურდა სხვადასხვა პირების მიერ დანაშაულის დაფარვაში მონაწილეობა, მტკიცებულებათა განადგურებაში მონაწილეობა და კონკრეტულ ფაქტში მონაწილე პირების დამალვის ორგანიზება და დამალვაში მონაწილეობაც.
ასევე სრულად დადასტურდა, რომ კონკრეტულმა პირებმა ყველაფერი გააკეთეს, რათა სხვადასხვა ადამიანები პასუხისგებაში არ ყოფილიყვნენ მიცემული.ასევე სრულად დადასტურდა, რომ მოხდა ნივთმტკიცებების დამალვა, კვალის დაფარვა, რათა კონკრეტული პირებისთვის ბრალი არ წაეყენებინათ და არ გამოვლენილიყო მათ მიერ დანაშაულში მონაწილეობა.
ბრალდებულის ჩვენება სრულ თავსებადობაშია საქმეში არსებულ ყველა უტყუარ მტკიცებულებასთან, დამაჯერებელია. ბრალდებულის ჩვენებაში ბრალდების მხარეს და ვერც ვერავის შეუძლია იპოვოს რამე ისეთი, რაც მიანიშნებს იმას, რომ ბრალდებულის ჩვენება არადამაჯერებელია.
ბრალდებულმა დაადასტურა კონკრეტულ პირებთან შეხვედრა, რომლებიც კონკრეტულ საქმეში ჩართული იყვნენ იმისთვის, რათა არ გამოვლენილიყო სხვა პირების დანაშაულში მონაწილეობა. კონკრეტული დაინტერესებული პირების ქმედებებს შედეგად მოჰყვა ის, რომ დანაშაულში მონაწილე პირები ჯერ კიდევ დაუსჯელი არიან და საგამოძიებო ორგანომ ყველაფერი გააკეთა, რათა მათ მიერ ჩადენილი დანაშაული მთლიანად გადაებრალებინა ორ ადამიანზე, რაც დაუშვებელია.
კონკრეტულ პირებზე, კონკრეტულ დეტალებზე საუბრის უფლება არ მაქვს, თუმცა, შემიძლია დაგიდასტუროთ, რომ ბრალდებულის ჩვენება სრულად ჩაჯდა დაცვის მხარის პოზიციაში, იმ ვერსიაში,რისიც სჯერა საზოგადოებას.
ძალიან სამწუხაროა, რომ თავის დროზე საგამოძიებო ორგანომ ეს საქმე სწორად არ გამოიძია, თორემ დღეისთვის ბრალდების მხარე ასეთ უხერხულ მდგომარეობაში არ აღმოჩნდებოდა. თავის დროზე ყველაფერი გაკეთდა, რათა წაეშალათ გარკვეული პირების მიერ დანაშაულის დამადასტურებელი მტკიცებულებები და გაენადგურებინათ. შესაბამისად კონკრეტული პირები არ დასაჯეს, რასაც მოჰყვა ის, რომ საქმე მთლიანად დაინგრა სასამართლოში განხილვის დროს და ნათლად დადასტურდა, რომ საგამოძიებო ორგანო ტენდენციური იყო. ბრალდების მხარე არათუ ჩიხშია, საერთო სისხლის სამართლის საქმე, რასაც ბრალდება ეყრდნობა, ფაქტობრივად არ არსებობს, ვინაიდან მათი პოზიცია, რომელიც ისედაც ძალიან უსუსური იყო, დღევანდელ სხდომაზე მთლიანად დაინგრა. რა თქმა უნდა, წინა სხდომებზეც, როცა უტყუარი მტკიცებულებები გამოვიკვლიეთ და დადასტურდა, რომ ბრალდების დადგენილებაში მითითებული გარემოებები კატეგორიულად განსხვავდება და აცდენილია ჭეშმარიტებისგან.
ბრალდებულის მიერ დადასტურდა კონკრეტული პირების მიერ დანაშაულში მონაწილეობაც, მკვლელობაში მონაწილეობაც და დანაშაულის დაფარვაში მონაწილეობაც. ასევე სრულად დადასტურდა კონკრეტული პირების მიერ მტკიცებულებების გაქრობისკენ მიმართული ღონისძიებები, რაც მათ სამწუხაროდ წარმატებით შეასრულეს", - აცხადებს კაკაბაძე.
