ეროვნული ბანკის პრეზიდენტი აცხადებს, რომ „ლიბერთი“ ბანკის ერთ-ერთი მეწილე ჰოლანდიური კომპანია, კანონით გათვალისწინებულ ყველანაირ სტანდარტს აკმაყოფილებს და ამ კომპანიასთან არესებული ეჭვები უსაფუძვლოა.
ამის შესახებ განცხადება დღეს პარლამენტში საფინანსო-საბიუჯეტო კომიტეტის სხდომაზე ეროვნული ბანკის პრეზიდენტმა კობა გვენეტაძემ ოპოზიციის იმ კრიტიკის საპასუხოდ განაცხადა, სადაც ოპოზიცია ხელისუფლებას ფულის გათეთრების მცდელობაში ხელის შეწყობაში ადანაშაულებს.
დღეს კომიტეტის სხდომაზე ენმ-ს წარმომადგენელმა რომან გოცირიძემ განაცხადა, რომ იმ ჰოლანდიური კომპანიის შესახებ, რომელმაც ლიბერთის წილი ცოტა ხნის წინ იყიდა, ინტერნეტში არცთუ ბევრი მასალა მოიპოვება და ჩნდება კითხვები ამ კომპანიის მეშვეობით ხომ არ ხდება ფულის გათეთრების მცდელობა. მან მაგალითად „თი-ბი-სი“ ბანკის ის შემთხვევა დაასახელა, როდესაც „თი-ბი-სიმ“ იყიდა „პროგრეს“ ბანკი, რომლის მფლობელი კომპანია პანამაში იყო დარეგისტრირებული და მსოფლიოში მიჩნეულია აფიორა კომპანიად.
შესაბამისად ის ამბობს, რომ „თი-ბი-სი“ რომელიც ლონდონის ბირჟაზეა გასული, რატომ უნდა დაფეთებულიყო „პროგრეს“ ბანკზე და რატომ უნდა ჩაეგდო თავი ასეთ დღეში. ეს ძალიან ბევრ კითხვას აჩენს და ჩნდება კითხვა „ლიბერთის“ შემთხვევაშიც იგივეს მცდელობასთან ხომ არ გვაქვს საქმე „ - განაცხადა რომან გოცირიძემ.
მის საპასუხოდ კობა გვენეტაძემ კი მხოლოდ „ლიბერთის“ ნაწილში გააკეთა განცხადება და აღნიშნა, რომ ამ ჰოლანდიურ კომპანიას ყველა დოკუმენტაცია წესრიგში აქვს და შემოწმების პროცესი დიდი ხნის განმავლობაში მიმდინარეობდა ვიდრე გადაწყვეტილება იქნებოდა მიღებული, თუმცა მას „თი-ბი-სის“ მიერ „პროგრეს“ ბანკის ყიდვაზე კომენტარი არ გაუკეთებია.
