ხორავას ქუჩაზე მოკლული ლევან დადუნაშვილის დედა, ნათია საყვარელიძე დამოუკიდებელი ექსპერტის, მაია ნიკოლეიშვილის მიერ ჩატარებულ ექსპერტიზის დასკვნას გამოეხმაურა. მისთვის აღნიშნული ექსპერტიზა კატეგორიულად მიუღებელია.
"მე თვითონ სამედიცინო მაქვს დამთავრებული და მე მესმის რაც მან ილაპარაკა. მაია ნიკოლეიაშვილს ეგონა რომ ჩვენ ძალიან გაუნათლებლები, დებილები ვისხედით დარბაზში და ვერ გავიგებდით მის ლაპარაკს. განსაკუთრებით, აღმაშფოთა იმან რომ თურმე, მაკრატლითაა ჩემი შვილი მოკლული. როგორ შეიძლება იქ მაკრატელი ყოფილიყო ნახმარი. ელემენტარულად თუ ხარ პროფესიონალი, ამას არ იტყვი და საუბარია ორი 16 წლის ბიჭის სიცოცხლეზე. ჩემთვის შეურაცხმყოფელი იყო რაც მაია ნიკოლეიშვილმა ილაპარაკა.
ჩემ შვილთან მიმართებაში ერთი დანა ფიგურირებს და მე რა ვერსიაც ვიცი, იმ ვერსიას როგორც კი არ დაემთხვევა პროკურატურის და დაცვის მხარის ვერსია, აი იქ მიფრთხილდეს ყველა. ჩემს შვილს არ გაეკაროს არავინ.
ჩემთვის გგონიათ ადვილია აქ რომ ვზივარ 6 თვეა? გგონიათ პროკურატურასთან არ მაქვს კითხვები? მე პირველ რიგში პატივს ვცემ ჩემი შვილის ღირსებას. ჩემი 16 წლის ბიჭს მეტი ღირსება ჰქონდა, ვიდრე აქ, მასზე უფროსებს.
არ დავინახო ვინმემ მითხრას რომ ლევანის წინაშე ორი მკვლელი იყო. მე შეიძლება ისეთი ინფორმაციაც ვიცოდე, რაც პროკურატურამ არ იცის. ასეთი სადისტური მკვლელობა როგორ შეიძლება სხვას დავაბრალო. ჩემს შვილთან მიმართებაში ოფიციალურ ვერსიას ვეთანხმები", - აცხადებს საყვარელიძე.
