ქონებრივ საკითხებზეც ვისაუბრეთ. მრავალი წლის მუშაობის შემდეგ, დადებითად გადაწყდა მოსკოვში ჩვენი საელჩოს შენობის საქართველოსათვის კუთვნილებაში გადაცემის საკითხი, - ამის შესახებ რუსეთთან ურთიერთობების საკითხებში საქართველოს პრემიერ-მინისტრის სპეციალურმა წარმომადგენლმა ზურაბ აბაშიძემ რუსეთის საგარეო საქმეთა მინისტრის მოადგილე გრიგორი კარასინისთან შეხვედრის შემდეგ განაცხადა.
„ჩვენმა საგარეო უწყებამ საკმაოდ წარმატებულად დაასრულა ამ საკითხზე მუშაობა, რაც მისასალმებელია. ძალიან კარგად იმუშავა ამაზე ჩვენმა ინტერესთა სექციამ რუსეთში“, – განაცხადა ზურაბ აბაშიძემ.
რააც შეეხება რუსეთის საგარეო საქმეთა მინისტრის მოადგილეს, მისი თქმით, მოსკოვში ის ორი შენობა, სადაც საქართველოს საელჩო ფუნქციონირებდა და შემდეგ ინტერესების დამცველი სექცია, საქართველოს მხარეს საკუთრებაში გადაეცემა. ამისკენ დიდი ხანია მოვდიოდით.
„პროცესი ჯერ დასრულებული არ არის მიწასთან და სხვა პირობებთან დაკავშირებით, მაგრამ მთავარია, რომ სწორი მიმართულებით ვმოძრაობთ. იმედი გვაქვს, რომ თბილისშიც რუსეთის ინტერესების დამცველი სექციაც მიიღებს რეკვიზიტებს შენობასა და მიწასთან დაკავშირებით. შენობების გაცვლას არ ვაპირებთ. ეს შემხვედრი პროცესია. უნდა დავარეგულიროთ ეს საკითხები. წინააღმდეგ შემთხვევაში, თუ ავწონ-დავწონით, ამ საკითხებმა შესაძლოა, ხელი შეუშალოს ორ ქვეყანას შორის ურთიერთობის დარეგულირებას“, – აღნიშნა გრიგორი კარასინმა.