პროკურატურა უკან დახევას არ აპირებს, იმავეთი მინდა ვუპასუხო, არც მე ვაპირებ უკან დახევას. ჩემი შვილის მკვლელები სააშკარაოზე აუცილებლად უნდა გამოვლინდნენ და აუცილებლად უნდა დაისაჯონ ის პირები, რომლებმაც მცირედი დანაშაული მაინც ჩაიდინეს ხორავას ქუჩაზე მომხდარი ინციდენტის დროს - ასე პასუხობს „ჯი-ეიჩ-ენთან“ მთავარი პროკურორის, ირაკლი შოთაძის განცხადებას მოკლული მოზარდის, დავით სარალიძის მამა, ზაზა სარალიძე.
შოთაძე აცხადებს, რომ საქმეში არ მოიპოვება არცერთი მტკიცებულება, რომ ხორავას ქუჩაზე მომხდარ მკვლელობაში ორი ადამიანის გარდა, სხვა ვინმეს დანა აქვს გამოყენებული.
„შოთაძე მართალს ამბობს, საქმეში ორზე მეტი დანა არ არის იქიდან გამომდინარე, რომ საქმეს არ იძიებენ, დანაშაულის გამოძიება არ უნდათ. გ.მ. დაჭრილი იყო, ეს ფაქტი გამოძიებული ხომ არ არის? ფაქტია, რომ მესამე დანაც იყო. რა მოცემულობაც თავიდან პროკურატურას ჰქონდა და რაც შოთაძემ თავად განაცხადა გამოძების მიმდინარეობის დროს, რომ ამ საქმეზე დამნაშავეთა რიცხვი არ გაიზრდებოდა, იგივე ჩვენებას აწვებიან ბოლომდე.
რაც შეეხება სუბელიანის ამ საქმეში მონაწილეობას, რა საკითხზეც არის თენგიზ კალანდია დაკავებული, აბსოლუტურად იდენტურია მირზა სუბელიანის დანაშაული“, - აცხადებს სარალიძე.
როგორც ის განმარტავს, დამნაშავეების დასასჯელად ბრძოლის შეყწვეტას არ აპირებს თუნდაც, ეს სიცოცხლის ფასად დაუჯდეს.
„ყველას მივმართავ, გვერდში დამიდგნენ და ჭეშმარიტების დადგენაში დამეხმარონ. ეს ბრძოლა არ გაჩერდება! მარტო მომიწევს ბრძოლა? მარტო ვიბრძოლებ! მომკლავენ? მომკლან!“, - აცხადებს სარალიძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
