ძალიან მნიშვნელოვანია, აშშ-სთან დაიწყოს მოლაპარაკებები თავისუფალ ვაჭრობასთან დაკავშირებით, - ამის შესახებ საქართველოს პარლამენტის ვიცე-სპიკერმა თამარ ჩუგოშვილმა განაცხადა.
მან პრემიერ-მინისტრის ამერიკის შეერთებულ შტატებში ვიზიტი შეაჯამა და აღნიშნა, რომ კვირიკაშვილის ვიზიტის ფარგლებში დაფიქსირდა ძალიან მნიშვნელოვანი გზავნილები.
მისივე თქმით, ამერიკის შეერთებული შტატების მხარდაჭერა რამდენიმე სხვადასხვა კომპონენტშიც გამოიხატება, როგორიცაა დემოკრატიის განვითარება, ასევე, ეკონომიკური გაძლიერება და ეკონომიკური თანამშრომლობა, რაც სულ უფრო აქტუალური და მნიშვნელოვანი ხდება.
„იზრდება პირდაპირი ამერიკული ინვესტიციები, ასევე ძალიან მნიშვნელოვანია, რომ დაიწყოს მოლაპარაკებები თავისუფალ ვაჭრობასთან დაკავშირებით. შესაბამისად, ამ ვიზიტის დაფიქსირებული გზავნილები და ასევე, მაღალი ძალიან რანგი შეხვედრებისა ჩვენ საფუძველს გვაძლევს ვიფიქროთ, რომ ამერიკა, როგორც ჩვენი მთავარი სტრატეგიული პარტნიორი, კიდევ უფრო გააქტიურდება და კიდევ უფრო შეუწყობს ხელს საქართველოს განვითარებას როგორც უსაფრთხოების, ასევე, დემოკრატიული და ეკონომიკური განვითარების კუთხით. მინდა დავაფიქსირო პარლამენტის პოზიცია ამ ვიზიტთან დაკავშირებით - სიხარულით აღვნიშნავთ, რომ ურთიერთობები ამერიკის შეერთებული შტატების ამდინისტრაციასთან სულ უფრო ღრმავდება, სხვა საფეხურზე გადადის და დარწმუნებული ვარ, უახლოეს პერიოდში ეს კიდევ უფრო გამოიხატება კონკრეტულ შედეგებსა და ნაბიჯებში“, - განაცხადა ჩუგოშვილმა.