მგონია, რომ ამ შემთხვევაში, ეს პოზიცია სწორი არ არის, მაგრამ იმას არ ნიშნავს, რომ მზად არ ვართ, კონსულტაციები გავიაროთ და სახალხო დამცველის პოზიციაც მოვისმინოთ, - ამის შესახებ პარლამენტის ადამიანის უფლებათა დაცვის კომიტეტის თავმჯდომარის პირველმა მოადგილემ გედევან ფოფხაძემ შემოქმედების თავისუფლებასთან დაკავშირებულ კანონპროექტთან დაკავშირებით განაცხადა.
მისი თქმით, ის მზადყოფნას გამოთქვამს, რომ იმ შემთხვევაში, თუ შემოქმედებითი ნაწარმოების აკრძალვის თაობაზე მომზადებულ საკანონმდებლო პაკეტთან დაკავშირებით საფუძვლიანი არგუმენტების წარდგენა მოხდება, ცვლილებების გარკვეული კორექტირება განხორციელდეს.
„მგონია, რომ ამ შემთხვევაში, ეს პოზიცია სწორი არ არის, მაგრამ იმას არ ნიშნავს, რომ მზად არ ვართ, კონსულტაციები გავიაროთ და სახალხო დამცველის პოზიციაც მოვისმინოთ. თუ მისი არგუმენტები სწორი იქნება, შეიძლება გავითვალისწინოთ კიდეც. მგონია, რომ ეს კანონპროექტი კონსტიტუციურ სტანდარტს ადგენს და სწორედ იმას ემსახურება, რომ მოქმედი კანონმდებლობა კონსტიტუციასთან შესაბამისობაში იყოს მოყვანილი. ამ შემთხვევაში, ჩემი აზრი ყველაფრის განმსაზღვრელი არ არის და საკითხი დამატებით უნდა გავაანაალიზოთ. სურვილი არ გვაქვს იმის, რომ შემოქმედებით წრეებს დამატებითი შეზღუდვები დავუწესოთ, მაგრამ მიმაჩნია, რომ ეს კონსტიტუციური სტანდარტის ასახვა იყო კანონმდებლობაში. ინიცირება იმას არ ნიშნავს, რომ კანონპროექტის ავტორებს იმის სურვილი და რესურსი არ ჰქონდეთ, რომ ყველა განსხვავებული მოსაზრება მაქსიმალურად გაითვალისწინოს”, –განაცხადა ფოფხაძემ.
ცნობისთვის, სახალხო დამცველი შემოქმედების თავისუფლებასთან დაკავშირებულ კანონპროექტს ანტიკონსტიტუციურად მიიჩნევს.
