ხორავას ქუჩაზე მოკლული მოზარდის, დავით სარალიძის მამის, ზაზა სარალიძის განცხადებით, თვალთვალთან დაკავშირებით მის მიერ გაკეთებულ განცხადებას პროკურატურიდან არავინ გამოხმაურებია.
"არც არავინ დამკავშირებია, არც მე არ ვაპირებ განაცხადის შეტანას იქიდან გამომდინარე, რომ არცერთი საქმის გამოძიება, რომელიც მე მოვითხოვე, არ დაუწყიათ და არც ერთზე ინფორმაცია არ მაქვს საერთოდ. აქედან გამომდინარე, ჩემი აზრით, აზრი არ აქვს ამაზე განაცხადის შეტანას", - აცხადებს სარალიძე.
რაც შეეხება, დაანონსებულ აქციებს, როგორც ის აღნიშნავს, აქციების მიზანი სამართლიანობის აღდგენა იქნება.
"აქციებს ის მიზანი ექნება, რომ აღდგეს სამართლიანობა. მარტო ეს ორი ადამიანი, რომელიც დღესდღეობით ბრალდებულის სკამზე ზის არაა დამნაშავე. მათ გარდა არის კიდევ ორი ადამიანი მინიმუმ, რომლებმაც დაჭრის ფაქტში მიიღეს მონაწილეობა", - აცხადებს სარალიძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.