„კახა კალაძის ინიციატივები ხელს უწყობს ჯანსაღი გარემოთი სარგებლობის კონსტიტუციით გარანტირებული უფლების რეალიზებას,“ - ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, სოფო კილაძემ, განაცხადა. კილაძე თბილისის მერის იმ გადაწყვეტილებას ეხმაურება, რომლის თანახმად, ელექტროავტობუსები და ელექტრომიკროავტობუსები დღგ-სგან უნდა გათავისუფლდეს, როგორც იმპორტის, ისე ადგილზე წარმოების შემთხვევაში.
მისი თქმით, ორივე ინიციატივა მნიშვნელოვნად შეუწყობს ხელს ქალაქში ჯანსაღი გარემოს შექმნას, რაც უკვე წლებია სერიოზული პრობლემაა და დედაქალაქის მცხოვრებლებსა და სტუმრებს სერიოზულ დისკომფორტს უქმნის.
„მინდა, გამოვეხმაურო თბილისის მერის ორ ინიციატივას, რომლებიც ძალიან მნიშვნელოვანია დედაქალაქში ჯანსაღი გარემოთი სარგებლობის უფლების რეალიზებისთვის - დამატებული ღირებულების გადასახადისგან ელექტროავტობუსებისა და ელექტრომიკროავტობუსების იმპორტისა და ადგილობრივი მიწოდების გათავისუფლების შესახებ, ასევე, თბილისის ტერიტორიაზე ხე-მცენარეების მოვლის სტანდარტული აგროტექნიკური ღონისძიებების გეგმა. ერთი მხრივ, ქალაქში შემცირდება მავნე გამონაბოლქვი და მეორე მხრივ, მწვანე საფარის მოვლა თვისობრივად მაღალ საფეხურზე გადაინაცვლებს, რაც მწვანე საფარს უფრო მეტად გაზრდის ქალაქში,“ - განაცხადა კილაძემ.
