რაც შეეხება ბატონი ზაზა სარალიძის განცხადებებს, თითქოსდა, მას უთვალთვალებენ, ეს ინფორმაცია მტკიცებულებებზე დაყრდნობილი არაა. მიუხედავად ამისა, ზაზა სარალიძის განცხადებაზე, თითქოსდა, განცხადების ჩაბარების დროს ჩუმად კამერების საშუალებით კადრებს უღებდნენ, საქართველოს მთავარი პროკურატურის გენინსპექციის მიერ შესაბამისი მოქმედებების ჩატარება მიმდინარეობს, რის შედეგადაც დადასტურდება აღნიშნულ ფაქტს ჰქონდა თუ არა ადგილი, - განაცხადა ჟურნალისტებთან ხორავას ქუჩაზე მოზარდებს შორის მომხდარი მკვლელობის საქმის პროკურორმა, ზვიად ფხაკაძემ.
ის ხორავას ქუჩაზე მოკლული მოზარდის მამის, ზაზა სარალიძის მიერ დაანონსებულ აქციებსაც გამოეხმაურა და აღნიშნა, რომ გამოხატვის უფლება ყველა ადამიანს აქვს.
"რაც შეეხება დაანონსებულ აქციებს, საქართველოს პროკურატურა აცხადებს, რომ ყველა ადამიანს აქვს გამოხატვის უფლება, ჩაატაროს აქციები, დააფიქსიროს თავისი პოზიცია, მაგრამ იმპერატიულად ვაცხადებ, რომ საქართველოს პროკურატურა ემიჯნება პოლიტიკურ განცხადებებს, ვინაიდან პროკურატურა აპოლიტიკური ორგანიზაციაა. ეს საქმე მეტად სენსიტიური ხასიათისაა, მასზე საზოგადოების მაღალი მოთხოვნაა. შესაბამისად, აღნიშნული საქმის პოლიტიკურ ჭრილში გადატანა პროკურატურის ინტერესებში არ შედის", - აცხადებს ფხაკაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
