„აშშ-ის ვიცე-პრეზიდენტ მაიკ პენსისა და პრემიერ-მინისტრ გიორგი კვირიკაშვილის შეხვედრა ამერიკელ და ქართველ ხალხებს შორის ძლიერი მეგობრობის დადასტურებაა,“ - ამის შესახებ საპარლამენტო უმრავლესობის ლიდერმა, არჩილ თალაკვაძემ, განაცხადა. თალაკვაძის კომენტარს საქართველოს პარლამენტის პრესსამსახური ავრცელებს, სადაც ნათქვამია, რომ ქართული დელეგაციის ვიზიტი ამერიკის შეერთებულ შტატებში საქართველოს მომავალზე დადებითად აისახება.
„ამას მოჰყვება ხელშესახები შედეგები ქვეყნის ეკონომიკის და უსაფრთხოების გაძლიერების თვალსაზრისით. უნდა აღინიშნოს, რომ საგარეო საქმეთა სამინისტრომ და ჩვენმა საელჩომ ამერიკაში ეფექტიანად იმუშავეს ამ ვიზიტის წარმატებულად ჩატარებისთვის. პოლიტიკური განცხადებები, რომელიც შეხვედრების შემდეგ გაკეთდა, აშკარად ამბობს იმას, რომ საქართველო დღეს აშშ-თან ურთიერთობის 25 წელში ძლიერი და საიმედო პარტნიორია. ტერიტორიით, აშშ-თან შედარებით, ჩვენ ვართ პატარა ქვეყანა, თუმცა, ჩვენს მიმართ დიდი იმედები და დიდი ნდობა არსებობს,“ - განაცხადა არჩილ თალაკვაძემ.