ჩვენ არ გვქონია არანაირი დაზუსტებული, არც დაუზუსტებელი ინფორმაცია და არც ეჭვი, რომ „ბასიანში“ ან მიმდებარე ტერიტორიაზე, ასაღებდნენ ნარკოტიკულ საშუალებებს. ჩვენ ვერ მივუთითებდით ვინმეზე, რომ ის იყო ნარკოტიკების რეალიზატორი. შეხვედრისას შს მინისტრს პირადად განვუცხადე, რომ მზად ვარ ვებრძოლო ნარკორეალიზატორებს მათთან ერთად და ამაზე მომავალში მუდმივად განვაცხადებთ თანამშრომლობის მზაობას - განაცხადა ჟურნალისტებთან კლუბ „ბასიანის“ ერთ-ერთმა დამფუძნებელმა, ზვიად გელბახიანმა შს მინისტრის, გიორგი გახარიას განცხადების საპასუხოდ.
როგორც ის განმარტავს, შსს-ს თავად მიმართეს მომაკვდინებელი ნარკოტიკული საშუალების ერთობლივად ამოღების თაობაზე.
„კლუბი „ბასიანი“ და მისი ერთ-ერთი თანადამფუძნებელი ნაჯა ორაშვილი იყო ერთ-ერთი პირველი, რომელმაც საჯაროდ განაცხადა, რომ ქალაქში არის მომწამლავი ნარკოტიკული საშუალება. მან მოუწოდა შსს-ს რომ დაგვხმარებოდა, ერთობლივად ამოგვეღო, ნებისმიერი ძალებით ეს მომაკვდინებელი საშუალება. ამ ფაქტიდან ერთი კვირის თავზე, ვიხილეთ ის ტრაგედიები, რაც ყველამ ერთად ვიხილეთ. რეალურად ჩვენ ვიყავით პირველები, შსს-გან განსხვავებით, რომლიც ვებრძოდით ამ ნარკოტიკულ საშუალებას, რომელმაც ამ შედეგებამდე მიგვიყვანა. აქედან გამომდინარე, ბუნებრივია, ჩვენ რომ ეს მომწამლავი ნივთიერება შეგვენიშნა კლუბის ტერიტორიაზე, დაუყივნებლივ შევატყობინებდით შსს-ს. ჩვენი დაცვის წევრები ზედმიწევნით ჩხრეკენ შემომსვლელებს, რათა არ მოხდეს ნებისმიერი ნარკოტიკული საშუალების შემოტანა“, - აცხადებს გელბახიანი.