უტყუარად არის დადასტურებული, რომ ბრალდებულებმა ბრალად შერაცხული ქმედება ჩაიდინეს და ჩაიდინეს იმ ორი დანით, რაც საქმეზეა დართული, -განაცხადა პროცესის დაწყებამდე ხორავას ქუჩაზე მოზარდების მკვლელობის საქმის პროკურორმა, ზვიად ფხაკაძემ.
მისი განმარტებით, ბრალდებულების ბრალი ნივთიერი მტკიცებულებებით, მოწმეთა ჩვენებებით და ექსპერტიზებით დასტურდება.
"დღეს ბრალდების მხარემ ორი მოწმე დაკითხა. ხსენებული პირები არიან ექსპერტ-კრიმინალისტები, რომელთაც უშუალოდ მოახდინეს საქმეზე ნივთმტკიცებად დართული 2 დანის ამოღება. მათ დაადასტურეს, რომ ამ მტკიცებულებებს საგამოძიებო ორგანოს არც ერთი თანამშრომელი არ შეხებია, ხსენებული დანების ამოღება მოხდა მათ მიერ, ყოველგვარი წესების დაცვით. ასევე გამორკვეული იქნა საქმეში არსებული ორი მოწმის ტანსაცმელი. ბრალდების მხარეს მიაჩნია, რომ ბრალდებულებისთვის წარდგენილი ქმედება დადასტურებულია მოწმეთა ჩვენებებით, ასევე ექსპერტიზის დასკვნებით და ნივთიერი მტკიცებულებებით. საქმეზე გამოკვლეული მტკიცებულებებით უტყუარად არის დადასტურებული, რომ ბრალდებულებმა ბრალად შერაცხული ქმედება ჩაიდინეს და ჩაიდინეს იმ ორი დანით, რაც საქმეზეა დართული", - აცხადებს ფხაკაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
