მოწმე დაიჭრა და ის არცერთ ბრალდებულს არ დაუჭრია, შესაბამისად, უტყუარად დგინდება რომ მესამე, ანუ კიდევ ერთი დანა იყო - განაცხადა ჟურნალისტებთან ხორავას ქუჩაზე მომხდარი მკვლელობის საქმეზე ერთ-ერთი არასრულწლოვანი ბრალდებულის ადვოკატმა, ტარიელ კაკაბაძემ.
მისი განმარტებით, საქმეზე გამოძიება სრულყოფილად არ არის ჩატარებული.
"ნივთიერი მტკიცებულებები გამოვიკვლიეთ, მათ შორის ტანსაცმელი, რომელიც მოწმეებს შემთხვევის ადგილზე ეცვათ. გამოვიკვლიეთ ტანსაცმელი პირისა, რომელიც ამბობს, რომ უკვე დაჭრილ სარალიძესთან და მის სისხლთან შემხებლობა არ მქონიაო. თუმცა, ექსპერტიზის დასკვნით აღმოჩნდა რომ მის ტანსაცმელზე, კონკრეტულად სახელურზე გარდაცვლილის სისხლი აღმოჩნდა. შესაბამისად, ღიად ჩნდება შეკითხვა, თუ გარდაცვლილთან შემხებლობა არ ჰქონია, როგორ აღმოჩნდა, გარდაცვლილის სისხლი მის ტანსაცმელზე.
აღნიშნული მოწმე დაიჭრა კონკრეტული ფაქტის დროს და დაიჭრა დანით, რომელიც არცერთ ბრალდებულს არ ეკუთვნოდა.თუ ბრალდების მხარე ამბობს, რომ შემთხვევის ადგილზე მხოლოდ ორი დანა იყო და სხვას არავის დანა არ ჰქონია. აღნიშნული მოწმე დაიჭრა და ის არცერთ ბრალდებულს არ დაუჭრია, შესაბამისად, უტყუარად დგინდება რომ მესამე, ანუ კიდევ ერთი დანა იყო. ბრალდების მხარე კი ჯიუტად აპელირებს, რომ ორი ბრალდებულის გარდა, დანა არავის ჰქონია.
ამ ადამიანის მიმართ ექსპერტიზის ჩატარება არ მომხდარა ჭრილობის სიგრძის, პარამეტრების გასარკვევად, რათა პასუხი გასცემოდა კითხვას, არის თუ არა რომელიმე დანით აღნიშნული ჭრილობა მიყენებული.
საქმე გვქვს არაეფექტურ, არასრულყოფილ გამოძიებასთან, სწორედ ამიტომ ჭეშმარიტება ვერ დადგინდა. აღნიშნული საკითხების ნათელის მოსაფენად, დაცვის მხარის მოწვევით ბრიტანელი ექსპერტები საქართველოში 17 მაისს ჩამოდიან. იმედი გვაქვს, რომ პირველივე ინსტანციაში შევძლებთ ამ მტკიცებულების წარმოდგენას", - აცხადებს კაკაბაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
