პარლამენტის თავმჯდომარე ირაკლი კობახიძე აცხადებს, რომ ნარკოპოლიტიკასთან დაკავშირებული კანონპროექტი უახლოესი ორი კვირის ვადაში მომზადდება და დამტკიცება მიმდინარე მიმდინარე სესიის ბოლომდე აუცილებლად მოხდება.
„ჩვენ გავაკეთეთ უკვე გარკვეული განაცხადი იმასთან დაკავშირებით თუ რა ვადებში მომზადდება შესაბამისი კანონპროექტი და რა ვადებში იქნება მიღებული. ჩვენი ამოცანაა, რომ მიმდინარე სესიის ბოლომდე დავასრულოთ უკვე კანონპროექტის მიღება. ეს კი ნიშნავს იმას, რომ უახლოესი ორი კვირის ვადაში უნდა მომზადდეს შესაბამისი კანონრპოექტი“ - განაცხადა კობახიძემ.
ამასთან ის ეხმიანება უმრავლესობის გუნდში ამ კანონპროექტთან დაკავშირებით არსებულ უთანხმეობას და აცხადებს, რომ „პრინციპებზე უახლოესი ორი კვირის განმავლობაში შეჯერდება“.
„ეს არის ამოცანა და ვფიქრობ რომ ეს არის საკმაოდ რეალისტური ამოცანა“ - აცხადებს ირაკლი კობახიძე.
შეგახსენებთ, რომ ჯანდაცვის კომიტეტის თავმჯდომარის აკაკი ზოიძის ინიციატივით მომზადებული კანონპროექტი, რომელიც ნარკომომხმარებლებისთვის სანქციების შერბილებას, ხოლო რეალიზატორებისათის გამკაცრებას ითვალისწინებს, ჯერ კიდევ ერთი წლის წინ მომზადდა. თუმცა, უმრავლესობის შიგნით არსებული პოზიციების შეუთანხმებოლობის გამო მისი დამტკიცება დღემდე ვერ ხერხდება. ერთი კვირის წინ ბიუროს სხდომაზე უმრავლესობის ნაწილის მოთხოვნით, იურიდიულ კომიტეტში განხილვა ერთი თვით გადაიდო.