ექსპერტ-კრიმინალისტები დაიკითხებიან, რომელთა მეშვეობითაც დანაშაულის საგნის, დანების ამოღება მოხდა - განაცხადა პროცესის დაწყებამდე ხორავას ქუჩაზე მოზარდების მკვლელობის საქმის პროკურორმა, ზვიად ფხაკაძემ.
მისი განმარტებით, დღეს ბრალდების მხარე თავისი მტკიცებულებების გამოკვლევას დაასრულებს.
"დღევანდელ სასამართლო სხდომაზე ბრალდების მხარე განაგრძობს მტკიცებულებების გამოკვლევას, დაიკითხება ორი ექსპერტ-კრიმინალისტი, რომელთა მეშვეობითაც უშუალოდ მოხდა დანაშაულის საგნის, დანების ამოღება. ერთი დანა ამოღებულ იქნა შემთხვევის ადგილის დათვალიერების დროს, ხორავას ქუჩა #4 მდებარე ეზოდან, მეორე დანა საგამოძიებო ექსპერიმენტის დროს, ერთ-ერთმა მოწმემ მიუთითა, სად, რა ვითარებაში ინახავდა დანას, ასევე ამოღებულია ის "სალფეტკი", რაშიც გახვეული იყო ხსენებული დანა. აღნიშნული ნივთიერი მტკიცებულებები ბრალდების მხარის ერთ-ერთ ძირითად მტკიცებულებებს წარმოადგენს. ამასთანავე, იოტისოდენა ეჭვიც გამორიცხული რომ იყოს, ჩვენ დავკითხავთ ამ ორ პიროვნებას, რომლებიც უშუალოდ ისაუბრებენ რა ვითარებაში მოხდა ხსენებული საგნების აღმოჩენა, როგორ მოხდა მისი ამოღება, ვის ჰქონდა პირველად შეხება, რა ვითარებაში მოხდა მისი დალუქვა და გადაგზავნა ექსპერტიზაზე.
გამივიკვლევთ ნივთიერ მტკიცებულებებს, რომელიც გამოთხოვილია ექსპერტიზის ეროვნული ბიუროდან. ეს არის საქმეში არსებული მოწმეების ტანსაცმელები. შესაბამისად, ბრალდების მხარე აღნიშნული ნივთიერი მტკიცებულებების და მოწმეთა დაკითხვის შემდეგ, დაასრულებს ადგილზე მტკიცებულებების გამოკვლევას.
ამ დანებზე არის დნმ პროფილი, რომელიც უტყუარია და რომლითაც დასტურდება კონკრეტულ პირთა შემხებლობა საგნებთან, კონკრეტულ დანებთან და ასევე "სალფეტკთან", - აცხადებს ფხაკაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
