ვინც შეურაცხოფად მიიღო ცეკვა, შევახსენებთ რომ 9 აპრილს დაღუპულებიც ცეკვავდნენ და მღეროდნენ, როცა ისინი დაარბიეს, - ამის შესახებ "თეთრი ხმაურის მოძრაობის" წევრმა ბექა წიქარიშვილმა პარლამენტთან მიმდინარე აქციაზე, სიტყვით გამოსვლისას განაცხადა.
მისი თქმით, ისინი რომ მათ გვერდით ყოფილიყვნენ, ზუსტად ასე მოიქცეოდნენ.
"ჩვენ პატივს ვცემთ ჩვენს ეროვნულ გმირებს. ვიცით, რომ ისინი ჩვენი თავისუფლებისთვის იბრძოდნენ და დღეს რომ აქ ვდგავართ, მათი დამსახურებაა. ჩვენ ქედს ვიხრით მათი ღვაწლის წინაშე. ვინც შეურაცხოფად მიიღო ცეკვა, შევახსენებთ რომ 9 აპრილს დაღუპულებიც ცეკვავდნენ და მღეროდნენ, როცა ისინი დაარბიეს. ისინი რომ ჩვენს გვერდით ყოფილიყვნენ, ასევე მოიქცეოდნენ",- განაცხადა ბექა წიქარიშვილმა.
ცნობისთვის, ამ წუთებში თბილისში, პარლამენტის შენობასთან „თეთრი ხმაურის მოძრაობის“ მონაწილეები და მხარდამჭერები აქციას მართავენ.
ისინი 12 მაისს კლუბ “ბასიანსა” და კლუბ “გალერიში” ჩატარებულ სპეცოპერაციას აპროტესტებენ. აქციის მონაწილეების მოთხოვნები უცვლელია.
მათ პრესკონფერენციაზე კრიზისიდან გამოსასვლელ გეგმაზე ისაუბრეს.
კრიზისიდან გამოსასვლელი გეგმა:
1. საქართველოს პრემიერმა, გიორგი კვირიკაშვილმა თქვას ვის ეკისრება პასუხისმგებლობა 12 მაისს კლუბებში ბასიანსა და გალერიში ჩატარებულ სპეცოპერაციაზე. სხვა შემთხვევაში გადადგეს;
2. მათი თქმით, სპეცოპერაცია შინაგან საქმეთა მინისტრის, გიორგი გახარიას გარეშე ვერ დაიგეგმებოდა, ამიტომ მიზეზებზე უნდა ისაუბროს მან. გარდა ამისა კვლავ რჩება მისი გადადგომის მოთხოვნა ძალაში;
3. საქართველოში არსებული ნარკოპოლიტიკის რეფორმა შეიცვალოს.