„ჩემი დაცვის ქვეშ მყოფის დაკავება რომელიმე კლუბის ტერიტორიაზე არ მომხდარა, ის დიღომში დააკავეს. მისი პირადი, მანქანის და სახლის ჩხრეკისას არანაირი ნივთიერება ამოღებული არაა, რომელსაც შესაძლოა, დანაშაულთან რაიმე კავშირი ჰქონდეს“, - განუცხადა „ჯი-ეიჩ-ენს“ სპეცოპერაციისას დაკავებული ერთ-ერთი პირის, თ.ჩ.-ს ადვოკატმა, გიორგი ფანცულაიამ.
როგორც ის განმარტავს, დაკავებულთან ამ დრომდე ჩვენების მისაღებად არავინ მისულა. შესაბამისად, ის ბრალს აღიარებს თუ არა, ამის გაჟღერებისგან ადვოკატი თავს იკავებს.
„ამ ადამიანისთვის ბრალი არ წარუდგენიათ, როგორც ჩემთვის ცნობილია, მას ბრალს დაახლოებით, 6 საათზე წარუდგენენ. მასთან ჯერ გამოკითხვაზე არავინ მისულა.მას ჩვენება მციემული არ აქვს, შესაბამისად, სანამ ის ჩვენებას არ მისცემს, მისი პოზიციის გაჟღერებისგან თავს შევიკავებ. საქმის მასალებს ბრალის წარდგენის შემდეგ გადმომცემენ. შესაბამისად, რაიმე მტკიცებულება, რომელითაც შესაძლოა, რამე კავშირი დგინდებოდეს შესაძლო დანაშაულთან, არ გვაქვს გადმოცემული“, - აცხადებს ფანცულაია.
ცნობისთვის, წუხელ კლუბ „ბასიანში“ და კაფე „გალერიში“ სპეცოპერაცია ჩატარდა, რის შედეგადაც დაკავებულია ნარკოტიკული საშუალების გამსაღებელი 8 პირი.
