ქალაქის მთავარ სამმართველოში იმყოფება გუშინ, სპეცოპერაციისას ერთ-ერთი დაკავებულის თ. ჩ.-ს ადვოკატი, გიორგი ფანცულაია. მან სამმართველოში შესვლამდე ჟურნალისტებთან კომენტარი გააკეთა.
„ამ ფაქტთან დაკავშირებით ერთ-ერთ დაკავებულთან პირველად ვახერხებ შესვლას, მასთან ჯერ არ მქონია კომუნიკაცია, შესაბამისად, ჩემთვის მხოლოდ ცნობილია ის, რაც ტელევიზიით გავრცელდა. უშუალოდ დაკავებულისგან პირველ რიგში, უნდა მოვისმინო ინფორმაცია, რას ედავებიან. შესაბამისად, აქვს თუ არა რამე შემხებლობა მას შესაძლო დანაშაულთან. ჩემთვის როგორც ოჯახის წევრებისგანაა ცნობილი, დაკავებულს ჩაუტარდა მანქანისა და პირადი ჩხრეკა. მისი ოჯახისგან რაც ვიცი, არანაირი ნივთიერება არ ამოუღიათ. რაც შეეხება დეტალებს, საქმის მასალები გადმოცემული არაა. როგორც ვიცი, არც ბრალია წაყენებული. აქედან გამომდინარე, დეტალებზე ვერ ვისაუბრებ“, - განაცხადა გიორგი ფანცულაიამ.
ცნობისთვის, წუხელ კლუბ „ბასიანში“ და კაფე „გალერიში“ სპეცოპერაცია ჩატარდა, რის შედეგადაც დაკავებულია ნარკოტიკული საშუალების გამსაღებელი 8 პირი. სპეცოპერაცია გააპროტესტეს კლუბ „ბასიანში“ და კაფე „გალერიში“ მყოფმა პირებმა, ისე რიგითმა მოქალაქეებმა, რომლებმაც მოგვიანებით პარლამენტის შენობასთან გადაინაცვლეს. საპროტესტო აქციაზე ადმინისტრაციული წესით, ოფიციალურად დაკავებულია 20 პირი, თუმცა არაოფიციალური ინფორმაციით, დაკავებულთა რაოდენობა გაცილებით მეტია.
