მე მწამს საქართველოსი, მჯერა ჩვენი განსაკუთრებულობის, მჯერა ჩვენი ევროპული პერსპექტივის და ზუსტად ვიცი, რომ აუცილებლად დავიბრუნებთ ჩვენს აფხაზ და ოს ძმებს და, რომ უდიდესი წარსულის ხალხს გვექნება ღირსეული მომავალი, - – ამის შესახებ პარტია „ქართული ოცნება-დემოკრატიული“ საქართველოს თავმჯდომარე ბიძინა ივანიშვილმა განაცხადა.
„ეს არის ჩემი მთავარი და აბსოლუტური მიზანი. ამ საქმეს ბოლომდე მივიყვანთ და გავიმარჯვებთ. სწორედ ამიტომ დავბრუნდი პოლიტიკაში“, – განაცხადა ბიძინა ივანიშვილმა.
მისივე თქმით, საქართველო ღირსეულად დაიმკვიდრებს თავს ევროპულ ოჯახში, როგორც გამორჩეული ერი.
„სრულიად განჭვრეტად მომავალში ჩვენ ღირსეულად დავიმკვიდრებთ თავს ევროპულ ოჯახში, როგორც გამორჩეული, თვითმყოფადი ერი, უძველესი ქრისტიანული კულტურის, უნიკალური დამწერლობის და პოლიფონიის, ტრადიციული მეღვინეობის და ვეფხისტყაოსნის ქვეყანა, დასახლებული გულღია და ტოლერანტი ადამიანებით, სადაც სწამთ, რომ „სტუმარი ღვთისაა“. სტუმარმასპინძლობა ჩვენი ეროვნული იდენტობის ნაწილია და ძალიან მალე ეს გამორჩეული თვისება, მე ვიტყოდი – ჩვენი საწყისი უპირატესობა, სწრაფი განვითარების და კეთილდღეობის წყაროდ უნდა გადაიქცეს, როგორც მთლიანად ქვეყნისთვის, ისე ათასობით ქართული ოჯახისთვის“ – განაცხადა ბიძინა ივანიშვილმა, რომელმაც აქვე აღნიშნა, რომ საქართველოს შესწევს უნარი, უმასპინძლოს არამხოლოდ მილიონობით ტურისტს, არამედ საუკეთესო პირობებით, უმაღლეს დონეზე უმასპინძლოს საერთაშორისო ფორუმებს, უმასპინძლოს დიდ ბიზნესს, გახდეს განათლების, სამედიცინო მომსახურებისა და მაღალი ტექნოლოგიების რეგიონალური ცენტრი.
მისივე განცხადებით, საჭიროა მხოლოდ მიზანდასახულობა, რწმენა და შრომა, „ყველაფერი დანარჩენი ჩვენ უხვად მოგვანიჭა ბუნებამ“.
