ხორავას ქუჩაზე მოზარდებს შორის მომხდარი მკვლელობის საქმეზე ბრალდების მხარემ მტკიცებულებების გამომვლევა თითქმის დაასრულა. როგორც ერთ-ერთი ბრალდებულის ადვოკატმა, ტარიელ კაკაბაძემ ჟურნალისტებთან განაცხადა, მომდევნო კვირიდან, უკვე დაცვის მხარე დაიწყებს მტკიცებულებების გამოკვლევას.
"დღევანდელ სხდომაზე დაიკითხა ორი პირი, რომლებიც ფაქტის შემსწრე პირები არ იყვნენ და მათ ძალიან მწირი ინფორმაცია გააჩნდათ მოცემულ ფაქტთან დაკავშირებით. ასევე, ნაწილობრივ გამოვიკვლიეთ ვიდეოჩანაწერი, რომელიც საქმეში დევს. დღეს ასევე, ბრალდების მხარეს მოყვანილი ჰყავდა რამდენიმე მოწმე, რომელთა დაკითხვის ოქმების შინაარსი არ აზიანებდა დაცვის მხარეს, შესაბამისად ჩვენ გადავწყვიტეთ დაგვეყენებინა შუამდგომლობა და უდაოდ გავხადეთ ეს დაკითხვის ოქმები. შესაბამისად ამ მოწმეების დაკითხვა სასამართლოში აღარ მომხდარა. ბრალდების მხარემ თითქმის დაასრულა მტკიცებულებების გამოკვლევა. მხოლოდ ვიდეოჩანაწერის ნაწილია დარჩენილი გამოსაკვლევი და შესაბამისად შემდეგ სხდომაზე უკვე ბრალდების მხარე დაასრულებს მტკიცებულებების გამოკვლევას, მხარეები უკვე გადავალთ დაცვის მხარის მტკიცებულებების გამოკვლევაზე. დაცვის მხარე დავიწყებთ სხვადასხვა მოწმეების წარმოდგენას, ასევე სასამართლოში ჩვენების მისაცემად გამოვიძახებთ ბრალდებულებს. ისინი აუცილებლად დაიკითხებიან და სასამართლოს მიაწვდიან სრულ ინფორმაციას, იმასთან დაკავშირებით, თუ რა მოხდა კონკრეტულ დღეს. ასევე სასამართლოში დასაკითხად მოვიწვევთ ექსპერტებს, რომელბმაც ჩაატარეს სხვადასხვა სახის ექსპერტიზა და სასამართლოში ვიშუამდგომლებთ, რომ საქმეს მტკიცებულებად დაერთოს ახლი ექსპერტიზის დასკვნა, რომელზეც დაცვის მხარის მიერ მოწვეული ექსპერტები უკვე მუშაობენ", - აცხადებს კაკაბაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
