"ქართულ ოცნებას" აუცილებლად ეყოლება ღირსეული საპრეზიდენტო კანდიდატი, - ამის შესახებ ფინანსთა მინისტრმა მამუკა ბახტაძემ დღეს გამართულ პრესკონფერენციაზე განაცხადა.
მისი თქმით, მმართველ გუნდს მიაჩნია, რომ პარტიის თითოეულ წევრს შეუძლია თავისი შესაძლებლობებისა და ხედვების რეალიზაცია.
მინისტრის თქმით, უკანასკნელი პერიოდის განმავლობაში გავრცელებული ინფორმაციები, მისი შესაძლო პრემიერ-მინისტრობისა და შესაძლო საპრეზიდენტო კანდიდატობის შესახებ, რეალობას არ შეესაბამება.
"ძალიან ბევრი ჭორი წამოვიდა ბოლო 2 თვის განმავლობაში, რა თქმა უნდა, ეს არ შეესაბამება რეალობას, თუმცა რაც შემიძლია დავადასტურო არის ის, რომ "ქართულ ოცნებას" აუცილებლად ეყოლება ღირსეული კანდიდატი, რომელიც ღირსეულ შედეგს დააფიქსირებს შემოდგომის არჩევნებზე. მე ვარ იმ თანამდებობაზე, სადაც ჩვენს პოლიტიკურ გუნდს მიაჩნია, რომ თითოეულ ჩვენგანს შეუძლია თავისი შესაძლებლობების და ხედვების რეალიზაცია", - განაცხადა ბახტაძემ.
