„იმ ფონზე რომ გეგელაშვილს 5 წლის შვილი ჰყავს, ბავშვს მამასთან არ აქვს კონტაქტი და ბავშვი პრაქტიკულად ქუჩაში დარჩა, ვფიქრობთ, რომ სასამართლოს გადაწყვეტილება ძალიან მკაცრი იყო“, - განაცხადა ინტერნეტის საშუალებით ნარკოტიკების გასაღების ფაქტზე დაკავებულების, ნინო გეგელაშვილისა და გიორგი გოგებაშვილის ადვოკატმა, მარიკა ფხალაძემ.

მისი განმარტებით, სასამართლოს დაკავებულების მიმართ აღკვეთის ღონისძიების სახით პტიმრობა არ უნდა გამოეყენებინა.  

„აღკვეთის ღინისძიების მიზანი ის არის, რომ პიროვნებამ ხელი არ შეუშალოს გამოძიებას, არ მიიმალოს და არ მოახდინოს მტკიცებულებათა განადგურება. ნინო გეგელაშვილმა დაკავების მომენტიდანვე ითანამშრომლა გამოძიებასთან და რაიმე საშიშროება, რომ ხელს შეუშლის გამოძიებას და მტკიცებულებებს გაანადგურებს, არ არსებობს.

რაც შეეხება გოგებაშვილის ნაწილს, ბრალდების მხარემ ამ საქმეში მის ჩართულობაზე ასეთი არგუმენტი მოიყვანა, რომ სახლიდან ამოღებულია პირადობის მოწმობა, რომლითაც რეგისტრირებულია ონლაინ ტოტალიზატორების ანგარიშები და ამ ანგარიშებს მიბმული აქვს გოგებაშვილის სახელზე გაფორმებული ბარათი. ეს არგუმენტები ნამდვილად არ არის იმისთვის საკმარისი, რომ პირს არათუ აღკვეთის ღონისძიება შეეფარდოს, არამედ, ბრალიც კი წარედგინოს. საგულისხმოა ისიც, რომ ეს პირადობის მოწმობა გეგელაშვილის პირადი ნივთებიდანაა ამოღებული. საბანკო ანგარიშის მიბმაზეც გოგებაშვილმა არაფერი იცოდა და თავად გეგელაშვილმა თქვა ეს“, - აცხადებს ფხალაძე.

ცნობისთის, სამართალდამცავებმა 27 წლის ნინო გეგელაშვილი და 24 წლის გიორგი გოგებაშვილი ნარკორეალიზების ბრალდებით 8 მაისს დააკავეს.

ბრალდებულებს საქართველოს სისხლის სამართლის კოდექსის 260-ე მუხლის მესამე ნაწილის ,,ბ" და მეხუთე ნაწილის „ბ" ქვეპუნქტით ედებათ ბრალი. 

დაკავებულთათვის წარდგენილი ბრალდება სასჯელის სახედ და ზომად 7-დან 14 წლამდე თავისუფლების აღკვეთას ითვალისწინებს.