"გამოძიება მიმდინარეობს იმის დასადგენად, თუ სად და როგორ ყიდულობდნენ თავად ბრალდებულები ნაკოტიკულ საშუალებებს და ფსიქოტროპულ ნივთიერებებს“, - განაცხადა ჟურნალისტებთან ინტერნეტის საშულებით ნარკოტიკების გასაღების ფაქტზე დაკავებულების საქმის პროკურორმა, ირინე ჩოჩიამ.
მისი განმარტებით, გამოძიების მეირ არაერთი მტკიცებულებაა მოპოვებული, რაც ნინო გეგელაშვილისა და გიორგი გოგებაშვილის ბრალეულობას ადასტურებს.
"მოპოვებული იქნა არაერთი კონკრეტული მტკიცებულება, რაც ადასტურებს იმ გარემოებას, რომ როგორც ნინო გეგელაშვილი, ასევე გიორგი გოგებაშვილი ჯგუფურად, ერთმანეთთან შეთანხმებით ახორციელებდნენ სხვადასხვა სახის ნარკოტიკული საშუალებებისა და ახალი ფსიქოტროპული ნივთიერებების უკანონოდ შეძენა-შენახვას და შემდგომში გასაღებას.
მოპოვებულ მტკიცებულებებს შორისაა ინტერნეტტოტალიზატორების ანგარიშები, რომლებზეც პირები თანხებს რიცხავდნენ, რათა მიეღოთ ნარკოტიკული საშუალებები. ამ ტოტალიზატორებით სარგებლობდნენ, როგორც ნინო გეგელაშვილი, ასევე გიორგი გოგებაშვილი. ასევე საბანკო ანგარიშები, რომელზეც ხდებოდა თანხის ჩარიცხვა და შემდეგ განაღდება, გიორგი გოგებაშვილზეა რეგისტრირებული. ასევე, მოპოვებულია სატელეფონო საუბრების ჩანაწერები და ბრალდებულთა გადაადგილების ვიდეოჩანაწერები, რომლებიც ადასტურებს, რომ ორივე შეთანხმებულად მოქმედებდა.
პირველი საკონტროლო შესყიდვისას შეძენილია ნარკოტიკული სშუალება ჰეროინი, მეორე შესყიდვისას მოხდა ბურენოფინის შემცველი აბისა და ახალი ფსიქოტროპული ნივთიერების შეძენა. ბრალდებულების დაკავებისას, კი ნინო გეგელაშვილის პირადი ჩხრეკისას და მანქანის ჩხრეკისას, პოლიციამ ამოიღო ახალი ფსიქოტროპული ნივთიერებები, 20 პაკეტად დაფასოებული და ასევე 20 სხვადასხვა მისამართიდან ამოღებული იქნა სარეალიზაციოდ გამზადებული ახალი ფსქოტროპული ნივთიერებები“, - აცხადებს ირინე ჩოჩია.
ცნობისთვის, ბრალდებულებს საქართველოს სისხლის სამართლის კოდექსის 260-ე მუხლის მესამე ნაწილის ,,ბ" და მეხუთე ნაწილის „ბ" ქვეპუნქტით ედებათ ბრალი.
დაკავებულთათვის წარდგენილი ბრალდება სასჯელის სახედ და ზომად 7-დან 14 წლამდე თავისუფლების აღკვეთას ითვალისწინებს.