მაღაზიის მეპატრონის ჩვენებით დადასტურდა წითელი მანქანის შემთხვევის ადგილზე ზუსტად იმ დროს ყოფნა, როცა ეზოში ჩხუბი მიმდინარეობდა, ანუ შეუძლებელი იყო მას ეს ყველაფერი არ დაენახა, - განაცხადა ჟურნალისტებთან ხორავას ქუჩაზე მოზარდების მკვლელობაში ერთ-ერთი არასრულწლოვანი ბრალდებულის ადვოკატმა, ტარიელ კაკაბაძემ.
როგორც ის განმარტავს, დღეს დაკითხული მოწმის ჩვენებამ კიდევ ერთხელ დაადასტურა, რომ გამოძიება არასწორადაა ჩატარებული.
"მოწმის დაკითხვით ნათლად გამოვლინდა, რომ საგამოძიებო მოქმედებები სწორად ჩატარებული არაა, ბრალდების მხარის მიერ წარმოდგენილი მტკიცებულებებით სიმართლე იმალება. ჩვენ ვხედავთ, რომ მოწმეები ჯერ ერთ რამეს ამბობენ, მერე კატეგორიულად უარყოფენ და სასამართლოს სულ სხვა ინფორმაციას აწვდიან, მოწმეები თვითმხილველები არიან როგორ დაჭრა რამდენიმე ადამიანმა ერთი ადამიანი, სასამართლოში ჩვენებას ცვლიან და ამბობენ, არაფერი დაგვინახავსო. რა თქმა უნდა, საფუძვლიანი ეჭვი ჩნდება რომ დაინტერესებული პირები მოწმეებზე ზეგავლენას ახდენენ, რაც განაპირობებს იმას, რომ მოწმეები მათ სასარგებლოდ ცვლიან ჩვენებას", - დასძენს ადვოკატი.
როგორც ის აღნიშნავს, მოწმემ შემთხვევის ადგილზე წითელი მანქანის ყოფნა დაადასტურა, რომელიც მოზარდების ჩხუბს შეესწრო.
"მაღაზიის მეპატრონის ჩვენებით დადასტურდა წითელი მანქანის შემთხვევის ადგილზე ზუსტად იმ დროს ყოფნა, როცა ეზოში ჩხუბი მიმდინარეობდა, ანუ შეუძლებელი იყო მას ეს ყველაფერი არ დაენახა. თუმცა, როცა ის პირი დავკითხეთ, თქვა არაფერი დამინახავსო. თუ ის პიროვნება ყველაფერს დაინახავდა და რაიმე სახის დახმარების მცდელობა ექნებოდა, ის სავარაუდოდ შეძლებდა დაჭრის თავიდან აცილებას. სავარაუდო სისხლის სამართლის დანაშაულთან გვაქვს საქმე. სამწუხაროდ, საგამოძიებო ორგანოს არაფერი გაუკეთებია რომ ეს ადამიანი პასუხისგებაში მისცენ", - აცხადებს კაკაბაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.